Silkyara/Dehradun, Naiwieng 21 (UNI)
Da ka jingpyndonkam da ki kor ring dur, ha ka Sngi Ba-Ar la ïohi ïa ki 41 ngut ki nongbylla kiba la sahkut naduh ka 12 tarik Naiwieng hadien ba ka la don ka jingtwa ha ka Tunnel ba dang shna ha Uttarkashi, Uttarakhand.
Ïa ki dur ki dar jong kitei ki nongbylla la ïohi hadien ba la pyndonkam da ki kor ring dur ba la tip kyrteng kum kita ki “Endoscopic Flexi Camera”.
Ban ïoh pyllait im ïa kitei ki 41 ngut ki nongbylla, la khot ïa ki ‘riew shemphang na kylleng ka pyrthei bad la pyndonkam ruh da ki kor ki bor ba bun rukom.
Ha ka Lah Sngi U Blei, la ïoh ban pyndait sa uwei u ‘pipe’ ba hynriew inshi hapoh jong ka Tunnel ba dang shna. Nalorkata, la jan dep ruh ban shna ïa ka surok da ka Border Roads Organisation (BRO) ban pynïaid nalor jong ka Tunnel.
Ki bor ba dei khmih ki la ïathuh ba yn pyrshang ban pyllait ïa kitei ki nongbylla da kaba ksam da ki kor ki bor nalor jong ka Tunnel.
Kitei 41 ngut ki nongbylla ki la sahkut hapoh ka Silkyara Tunnel kaba don 4.5 km naduh ka step jong ka 12 tarik Naiwieng hadien ba shi bynta jong ka Tunnel hajan Uttarkashi ka la khyllem namar ka jingtwa khyndew. Katei ka Tunnel kaba 4.5 km ka dei kaba don hapdeng ka shnong Silkyara bad Dandalgaon ban pynïasoh ïa ka Uttarkashi bad Yamunotri.
