Mairang, Naiwieng 21
U District Magistrate (DM) ka Eastern West Khasi Hill District, Mairang u Bah G Kharmawphlang IAS, u la pyntreikam da ka kyndon 144 CrPC kaba khang bad mana pyrshah ïa ki briew lane kynhun ban kem bad tong dohkha da kaba pyndonkam da ki kynja dawai ha ki wah bah lane wah duid kiba don hapoh ka District.
Ha ka kyrwoh khubor ba la phah, u District Magistrate u la ong ruh ba kane ka jingleh ka wanrah ïa ka jingpynjakhlia bad jingpynjot ïa ki kynja ba im hapoh ki um, ki wah bad ka pynsniew ïa ki sawdong sawkun bad ka pynlong ruh ka jingbym shngaiñ ïa ka koit ka khiah jong ki nongshong shnong.
Namar kata, na ka liang u District Magistrate u la mana jur ba lada lap ïa kiba ïaleh pyrshah yn pynshitom katkum ka kyndon aiñ 188 jong ka Indian Penal Code. Kane ka jingmana kan treikam noh mardor naduh ba la pynmih ïa kane ka hukum tat haduh ban da pynbna da kumwei.
