Shillong, Naiwieng 21
Ka Kong Ampareen Lyngdoh kaba dei ka Myntri Sorkar bad ruh ka MLA ka NPP na East Shillong ka la kiar na ka ban kynthoh eiei halor ka khubor ba ka NPP kan ai sha ka ïa ka tiket ban ïakhun ïa ka ilekshon MP ka ban long ha u snem ban wan na Shillong Parliamentary Constituency.
Ka Kong Ampareen ka kiar ban ong eiei halor kane ka mat bad ka la pynpaw ba ka bor ban pynsaphriang ïa kane ka jingtip ka dei beit na ka seng.
Lah ban kdew ba na ka liang u President ba dang shu shimti thymmai jong ka NPP Meghalaya, u Bah Prestone Tynsong u la dep ban pynpaw ba ïa u ne ka kyrtong ban ïakhun ïa ka ilekshon MP yn sa pynbna mynta u bnai.
Haba kren sha ki lad pathai khubor, ka Kong Ampareen, kaba la kam ba hap ban ïaid katkum ki kyndon ha shwa ban jied ïa u ne ka kyrtong, hynrei ha kajuh ka por ka la ong ba ka long pat kaba kloi ban mih shakhmat lada ailad ban ïakhun na ka Shillong Parliamentary Constituency.
“Kum kawei na ki nongtrei ka seng bad kaba long ruh kawei nongtrei kaba don ban shakri na ka bynta ki nongshong shnong ka Meghalaya, nga kloi ban shim ïa kane ka jingïaleh, lada ka seng jong nga, ka sngew ba nga long kaba bit ban shim ïa ka. Kumta, khlem da kwah kynthoh ne ong eiei ha kane ka kynti kaba mynta, ngan nym lah ban ong ne kren eiei halor kane ka mat. Ka seng kan dei kaba don ïa ka bor ban shim ïa ka rai,” la ong ka Kong Ampareen.
