Shillong, Naiwieng 21
Ki pulit ophisar ha ka kyrdan Deputy Superintendents of Police (DySP) bad Sub Inspectors of Police (SI) na ki Jylla bapher bapher ka Thaiñ Shatei Lam Mihngi ki la pyndep ïa ka jingshah hikai na North Eastern Police Academy (NEPA) hadien shisnem ba ki la shah hikai pyntbit ha ki bynta bapher bapher kiba ki pulit ki dei ban trei.
Kine ki pulit ophisar kiba la shah hikai ha NEPA Umsaw Khwan, ki hap ha ka 52nd Batch jong kane ka jingai jinghikai kaba la sdang naduh ka 15 tarik Naiwieng 2022.
Kine kiba la pyndep ki dei na Arunachal Pradesh, Mizoram, Nagaland, Tripura bad kham bun eh kiba shah hikai ki dei na Assam.
U Myntri Rangbah ka Assam, u Dr Himanta Biswa Sarma, u la wan sakhi ïa ka parade jong kine ki pulit ophisar kum ka jingpyndep jong ki ïa ka jingshah hikai, ha kaba la sakhi lang ruh da ki kmie ki kpa bad ki bahaïing hasem jong ki na kylleng ki Jylla ka Thaiñ Shatei Lam Mihngi.
U Director ka NEPA u Anurag Agarwal, IPS u la donlang bad pyntian smai ïa kine ki pulit ophisar kiba la pyndep ïa ka jingshah hikai, nalor ka jingdonlang ki DGP na kylleng ki Jylla bad kiwei kiwei ki nongshah khot sngewbha.
Kine kiba la dep shah hikai ha NEPA ki la ïoh shibun ki jingtip bad jinglah ruh ban shimti ïa ki kam ha ki bynta bapher bapher. Ki jinghikai kiba la ïoh ki long ha ki lai bynta kita, ka Police Science, Legal Studies, bad Social Science. Ki jinghikai kiba hap pyndep shabar bad pyni bor met ki kynthup ïa ka Drill, Weapons Training, Physical Efficiency, Police Operations and Tactics nalor ka shong kulai, jngai bad niah bad kilan met yoga.
Na ka liang u Dr Himanta Biswa Sarma, u la ai ka jingïaroh ïa kine ki pulit ophisar kiba la pyndep ïa ka jingshah hikai bad ïa ki kmie ki kpa bad bahaïing kiba la kyrshan ïa ki ha kine ki phew bnai ba ki shah hikai ha NEPA. Nalor nangta u la sam ruh ïa ki khusnam sha ki pulit ophisar kiba la lah ban lehbha ha ka por ba ki shah hikai.
