Shillong, Naiwieng 21
Kum shi bynta ban shimkhia ha kaba ïadei bad ki kam shah thombor jong ki samla kynthei hapoh ka skulbah North Eastern Hill University (NEHU), ka North Eastern Hill University Students’ Union (NEHUSU) ha ka Sngi Ba-ar ka la rai ban thaw da ka Gender Sensitization Committee.
Ha ka kyrwoh khubor kaba la pyllait da u Finance Secretary ka NEHUSU u samla Mandor Diengdoh u la ong, hadien jong ka jingsaphriang ka khubor lyngba ki lad pathai khubor halor ka kam jrongkti, ki la paw bun ki kam jrongkti ïa ki kynthei ba la ujor pyrshah ïa u Nantu Das, uba khmih ïa ka kam Security bad uba long ruh Assistant Director Sports jong ka NEHU, ha kaba ïa ka jingujor la ai kopi ruh sha ka NEHUSU.
U samla Mandor u la ong hadien ba ka NEHUSU ka la eksamin bniah ïa ka jingujor, ka la lap ba kane kam dei shuh ka sien ba nyngkong ba la kynnoh ba u Nantu Das u la thmu ban thombor ïa ki kynthei hynrei ki la don bunsien, hynrei na ka liang kito kiba shah thombor kim pynpaw paidbah satia namar ka jingtieng bad lehraiñ.
Hadien kane ka jingjia, u la ong ki la don ruh ki jingujor na ki samla khamtam na kito Research Scholars, kiba pynpaw bad kynnoh ba u nonghikai jong ki, u ju leh ki kam kiba long khlemakor.
Haba kynnoh ba ka NEHUSU ka la ïoh pdiang bun ki jingujor, u samla Mandor u la ong, “Ka NEHUSU ka sngewthuh ba ka la donkam ban thaw da ka Gender Sensitization Committee hapoh ka skulbah na ka bynta ki samla pule, ki nonghikai bad ki nongtrei”.
Haba pynpaw ka jingdonkam ban pynsngewthuh paidbah halor ki kam thombor, u la ong, “Ka NEHUSU ha ki sngi ban wan kan sa sdang noh ïa ka Gender Sensitization lyngba ki Workshops, Seminars, Lectures bad ban thaw da ka Gender Sensitization Committee ban ïakren halor ki kam thombor ïa ki kynthei”.
“Kum kine ki jingjia kin sa paw paidbah ha ki sngi ban wan namar ki samla pule ki la sngewthuh ïa la ka jong ka bor bad na ka liang ka NEHUSU kan ïeng ban kyrshan ïa ki lanot,” u la ong.
