Shillong, Naiwieng 21
Namar ka jingjur jong ka thok ka shukor bad jingshah pynngop pisa da ki jingkular lyngba ki kompeni ne ki online gaming, ka Khasi Students’ Union (KSU) ka la tyrwa sha u Branch Manager (BM) ka SBI Ladrymbai ban ai da ki jinghikai bad ki jingpynshai ban lait na kum kine ki jingshah thok.
Kane ka long hadien ba ka seng ka la ïoh pdiang ki jingujor na ki paidbah ba ki la shah thok da kaba shah pynngop ha ka kam pisa da kaba kular ban ai nong shibun tang da ka jingbei pisa (investment) barit lyngba ki kompeni lane ki online gaming, online trading kiba thok.
Ha kaba ïadei bad kane, ki nongïalam ka KSU East Jaiñtia Hills District Unit ha ka Sngi Ba-ar ba la lamkhmat da u samla Pynshai Kupar Dkhar Assistant General Secretary bad kiwei ki la ïakynduh ïa u Branch Manager ka State Bank of India (SBI) Ladrymbai ban kyrpad bad ruh ban ïatrei lang bad ka seng da kaba pynlong da ka prokram ai jingpynshai (awareness program) halor kine ki kam thok kam shukor (fraud cases) sha ki paidbah ka thaiñ East Jaiñtia Hills District ki ban kynthup naduh ki khynnah skul, ki khynnah leit klas bad ki rangbah ki longkmie kumjuh.
Shuh shuh kumjuh ruh khnang ba kin lait na ki jingshah pynbiej ha ki kompeni, online Earning apps lane ki briew ba kular ban pynïoh nong shiphew shah na ka jingpynlut ba khyndiat.
Ha kane ka jingïakynduh, la ong ba na ka liang u BM ka State Bank of India Ladrymbai Branch u la pdiang sngewbha ïa ka jingtyrwa ka seng bad kular ban ïasnoh kti lang bad ka seng ban ai jinghikai ïa ki paidbah ban lait na ki briew ba thok ba kwah ban bam pisa ei khlem da pynmih umsyep lane khlem da pyndonkam ïa ka jabieng.
Ka KSU ka kyntu ruh kumjuh ïa ki paidbah ban husiar bha na kino-kino ki jait kompeni lane ki briew ba wan ban khroh ïa ki ban kamai suk.
