Shillong, Naiwieng:
Ka Maria Syiem Jingsuk Balang Katholik Laitkyrhong ka khot bad wer ïa ki nongrwai na ki shnong bapher bapher ban ïashimbynta ha ka jingïakob rwai Khristmas ka ban sa long ha ka 15 tarik u Nohprah 2023 ha ka Madan phutbol Pdengshnong, Laitkyrhong East Khasi Hills District.
Haba kren sha ki lad pathai khubor ha ka Sngi Ba-ar, u Secretary jong ka CMC Laitkyrhong, u Bah Synshar Kshiar, u la ong ba ka jingpynlong ïa katei ka jingïakob rwai ka long kum shibynta ka jingrakhe ïa ka sngi lehkmen jong ki riewngeit khristan ha ka jingwan longbriew jong u Jisu shapoh kane ka sla pyrthei bad kane ka jingïakob kan plie lad plie lynti ruh ïa ki samla kiba don ïa ka sap ha ka rwai, ka tem bad ka put.
“Ka jingpynlong bad ka jingthmu jong kane ka jingïakob ka long ban rah ïa ka sap ka phong jong kito ki ‘riew donsap ha kaba nyngkong eh bad kiba na ka thaiñ jong ngi ruh kin ïoh shuh shuh ka lad ka lynti ban kiew ha ka rynsan ha kaba ki don lypa ka sap ka phong ban rwai ban put khnang ba kin lah ban kiew na kawei ka jaka sha kawei ka jaka ha ki rynsan bah kiba pynlong ïa kum kine ki jait prokram”, la ong u Bah Kshiar.
U Bah Kshiar u la ïathuh ba ki lahduh ha katei ka jingïakob kin ïohpdiang ïa ka khusnam da ka song pisa kaba T.50,000 katba kiba wan ba ar kin ïoh ïa ka khusnam pisa kaba T.30,000 bad kiba wan ba lai kin ïoh ïa ka khusnam kaba T.20,000.
Ha kaba ïadei bad ka bai rung kan dei T.500 na ka bynta kawei ka kynhun bad ka sngi khadduh ban ai kyrteng ka long haduh ka 2 tarik u Nohprah 2023 bad ki nongïashimbynta ki bun, yn pynïaid shwa da ka ‘Audition’. Ha katei ka jingïakob kin don ruh kiwei kiwei ki nongrwai ba paw ka jylla ki ban wan pynbyrngia ïa ki paidbah nongpeitkai kiba kynthup ïa u Carmel Dohling, u Wanjop Sohkhlet, ka Gracyl Ropmay, u Marangbah, ka Venetia Warshong, ki Serenity Choir nalor kiwei kiwei bad ki paidbah nongwan peitkai ha katei ka jingïakob rwai kim don kam satia ban siew ïa kano-kano ka bai rung.
