Jowai, Naiwieng 22
Ka jingpynsngap paidbah ne Public Hearing ba la khot pynlong da ka tnat Water Resource, West Jaiñtia Hills ha ka 22 tarik Naiwieng ka la long kaba ïaid beit ïaid ryntih da ka jingwan ïashim bynta ki dkhot ka Pynthornein Farmers Association, ki trai pynthor hali, ki bor pynïaid shnong jong ka Ladthadlaboh, Mihmyntdu, Rud Myntdu, ka Khooid Ya ka Wah Myntdu.
Ïa ka jingïalang la pynïaid da u Extra Assistant Commissioner ka West Jaiñtia Hills District u Bah Sylvester Phanbuh.
U Bah P Kurbah, Executive Engineer ka tnat Water Resource bad u Nangtiaki Tariang, SDO Water Resource, West Jaiñtia Hills ki la ïathuh ïa ka jingangnud ban leh ïa kaba bha tam na ka bynta ka jingmyntoi jong ki nongrep ha Pynthornein khamtam ban lait ki hali pynthor kumjuh u kba u khaw na ka jingshah ktah ha ka por ba jur u slap bad shlei ka Wah Myntdu.
U Bah Nangtiaki Tariang, SDO Water Resource, West Jaiñtia Hills u la batai shaphang ka projek ba ka don jingmut ban shna kum ki Morning Glory bad ka Labyrinth, bad u la ong ba la buhthong ban sdang trei na trai jong ki bynta ka Kshaid Tyrshi haduh ha jingkieng Myntdu bad ruh ki bynta jong ki wahduid ba noh sha ka wah Myntdu kaba don ha Pynthornein.
Shuh shuh ki ophisar ka tnat Water Resource ki la ïathuh ba kane ka dei ka projek hap ban buh jingtyrwa sha ka Sorkar Kmie, kumta donkam bha ban ïoh ïa ka rai na ki briew kiba don hok don bynta ha Pynthornein khnang ban lah ban leh ïa kaba donkam ha kaba ïadei bad ka DPR bad kiwei kiwei ki kam shwa ban kut ka Financial year jong u snem 2023-24.
U Bah Sylvester Phanbuh, MCS, Extra Assistant Commissioner ka West Jaiñtia Hills u la ailad ïa ki waheh Shnong, ki trai hali kumjuh ki nongïalam jong ka Pynthornein Farmers Association, Khooid Ya Ka Wah Myntdu ban ai jingmut ne pan jingshai ha kaba ïadei bad ka projek.
Na ka liang ki Waheh Shnong, ki nongrep ha Pynthornein ryngkat ki nongïalam ka Pynthornein Farmers Association, Khooid Ya Ka Wah Myntdu ki pdiang hun ïa kane ka projek hynrei ki kyrpad jur ïa ki ophisar jong ka tnat Water Resource ba ym dei ban shna tang dep ne trei thurmur ïa kane ka projek khnang ba kan long shisha ka jingkyrkhu ïa ki nongrep ka Pynthornein.
