Shillong, Naiwieng 22
Ki nongïalam jong ka seng ki ASHA ki la kam ba ka Sorkar ka la kular ban pynkiew noh ïa ka jingsiew kaba dei ka ‘fixed incentive’ kaba man u bnai sha ka T.3,000 bad na ka liang jong ka seng kam pat ai rai kat bym pat ai ka Sorkar da ka jingthoh haba ïadei bad kane.
Ki ASHA lane Accredited Social Health Activist (ASHA) ki ïoh T.2000 ka jingsiew kaba ju ai da ka Sorkar Jylla man u bnai nalor kiwei pat ki jingïoh (incentives) kiba ki ïoh katkum ka jinglah jong ki ban trei.
Ki nongkitkam jong ki ASHA kiba don hapoh ka synjuk jong ka Meg-halaya ASHA Workers’ Union (MAWU) ki la ïakynduh ïa ka Myntri ka koit ka khiah, ka Kong Ampareen Lyngdoh ha Secretariat ha ka Sngi Balang ban ïakren halor ki jingpynsngew jong ki ASHA khamtam eh ka ‘fixed incentive’ kaba ki ju ïoh na ka Sorkar Jylla.
Haba kren sha ki lad pathai khubor, ka Kong Mira June Myrsing kaba dei ka President ka MAWU ka la ïathuh ba ha ka jingïakynduh bad ka Myntri ryngkat ka jingdonlang ki ophisar ka tnat ka koit ka khiah bad National Health Mission, na ka liang ka Myntri ka la tyrwa sha ki ASHA ba ka Sorkar kan pynkiew ïa ka ‘fixed incentive’ kaba man u bnai na ka T.2000 sha ka T.3000.
Hynrei, ka Kong Myrsing ka la ong ba na ka liang ka Union kam pat lah ban rai tat haduh ban da ïohi ïa ka jingthoh kaba dei ban phah da ka Sorkar.
Ka la ong ba ha ka jingshisha ki ASHA ki la ap palat 2 kynta hadien ba la wai ka jingïakynduh, hynrei kim pat ïoh ïa ka jingthoh kaba dei ban phah da ka Sorkar Jylla halor ki jingïakren bad ki jingtyrwa kiba wan na ka liang ka Sorkar lyngba ka Myntri ka tnat ka koit ka khiah.
Ha kine ki khyndiat taïew ki ASHA ki la pynlong ka jingïakhih da kaba shongthait khlem trei ïa ki kam kiba ki dei ban pyndep kum ka jingpynbor ïa ka Sorkar Jylla ba kan pynurlong ïa kiba bun ki jingdawa kynthup ka jingpynkiew ïa ka bai siew kaba shisien shibnai.
