Shillong, Naiwieng 22
U President ka NPP Meghalaya State Unit u Bah Prestone Tynsong uba dei ruh u Symbud Myntri Rangbah ka Jylla u la ong ba kam shym la don satia kata ka jingïateh kular ban ïa sei ïa u kyrtong ïamon lang ha ka ilekshon MP.
“Ngim shym la ïateh kular satia bad kano-kano ka seng ne ka UDP ha kane ka kynti kaba mynta ban sei ïa uta u kyrtong ïamon lang na ka bynta ka ilekshon MP kumba la sei ha u snem 2019,” la ong u Bah Prestone.
Lah ban pynkynmaw ba ha ka ilekshon MP ha u snem 2019, ka Sorkar MDA-1 ka la sei da u kyrtong ïamon lang u Bah Jemino Mawthoh na ka shap jong ka seng UDP hynrei um shym la ïoh satia ka jingjop bad shah pynliem kput ha u kyrtong ka Congress u Bah Vincent H Pala.
Haba kylli, u Bah Prestone u la ong ba hadien ba thaw ïa ka sorkar MDA ha u snem 2018 ha ka por jong u Dr Donkupar Roy, ka la don ka jingïateh soskular ban sei da u kyrtong ïamon lang ha ka ilekshon MP, kumta la ïaid ruh ha kata ka lynti.
“Hynrei ha u 2023, hadien ka ilekshon MLA, haba ngi la thaw ïa ka Sorkar MDA-II, kam shym la don satia kano-kano ka jingïateh kular bad kino-kino ki seng kiba ïatreilang hapoh ka sorkar bad dei namar kane, ba ngi la rai ban pynïeng ïa la u jong u kyrtong ha ka ilekshon MP,” la ong u Bah Prestone.
