Shillong, Naiwieng 22
U Symbud Myntri Rangbah ka Jylla u Bah Prestone Tynsong uba khmih ruh ïa ka tnat Kam Pohïing ha ka Sngi Balang u la ong ba ka Sorkar Kmie bad ka Sorkar Jylla ki long kiba kloi ban don ka jingïakren ïasuk bad ki nongïalam jong ka seng kieng atiar ka Hynñiewtrep National Liberation Council (HNLC) wat shabar jong ka jylla Meghalaya.
“Lada phi sngew don jingartatien, ngi long kiba kloi ban pynïaid sha-khmat ïa ka jingïakren ïasuk wat sha kiwei ki jaka shabar na Meghalaya, kum ha Kolkata ne ha kiwei pat ki jaka,” la ong u Bah Prestone haba kren sha ki lad pathai khubor.
U Bah Prestone u la kyntu ïa ki nongïalam ba hakhmat eh jong ka seng HNLC ba kim dei satia ban don ka jingartatien ïa ka Sorkar Kmie bad Sorkar Jylla namar ki long kiba la khreh ban ai ïa ka lynti ïaid kaba shngaiñ ba kin wan sha ka miej ïakren ïasuk.
“Lada phi don ka jingsngew bym shngaiñ ban ïakren hapoh ka Meghalaya, ngi long kiba la khreh ban ïakren ha kano-kano ka jaka ruh bad lada phi kwah ban ïakren la ha kino-kino ki bynta jong ka Kolkata ne ha kiwei ki jylla jong ka ri ruh, ngi long kiba la khreh na ka bynta kata,” la ong u Symbud Myntri Rangbah.
U la ong, “Namar kata, ka jingkyrpad jong nga ïa ki nongïalam ba ha khliehduh ka HNLC ka long shai bha ba ka jingkhang ka dang ïai plie bad ngi kyrpad ïa ki ba kin sngewbha ban wan biang sha ka jingïakren bad ngi.”
Kane ka jingpynpaw jong u Bah Prestone ka la long hadien ba na ka liang u Chairman cum Commander in-Chief ka HNLC Bah Bobby Marweiñ bad u General Secretary cum Publicity Secretary Bah Saiñkupar Nongtraw ki la pynpaw ïa ka jingbym lah ban wan ïashimbynta ha ka jingïakren ïasuk tat haduh ba ka Sorkar ka la kloi ban weng noh ïa baroh ki mukotduma ba la pynngat pyrshah ïa ki bad ban ïasoi ïa ka soskular sangeh ïasiat.
“Nga la ïohi ïa kane ka jingpynpaw ki nongïalam ka HNLC, kumta nga kyrpad sa shisien ïa ki nongïalam ba kin wan biang sha ka jingïakren namar tat lada ngim ïoh ban ïakren markhmat, ngin nym lah ban tip ïa kaei ka jingkwah jong ki bad ngin nym lah ban poi shaei shaei ruh. Ha kine ki lai bad saw bnai, ngi la pyni ïa ka jingshimkhia, ha kaba ngi la kitkhia ïa ka bha ka miat ki dkhot ka seng, ngi la kitkhia ïa ka jingshngaiñ jong ki bad kam shym la don satia ka jingpyrshang ban kem ïa ki, balei ba phi dang don pat ïa ka jingsngewtieng,” la ong u Bah Prestone.
