Shillong, Naiwieng 22
Ha ka janmiet jong ka 22 tarik mynta u Naiwieng, ka la don ka jingmeh ding kaba ishyrkhei bha hajan ka lad Lumsohphoh, Lower Mawprem kaba don hajan ka jaka ïeng kali.
Katei ka jingmeh ding ka la sdang na ka jaka ba la buh ïa u ‘Transformer’ bad pynlong ïa ka bording hapoh ka shnong ba kan lip noh kumba katto-katne por eiei.
Haba ïoh ban ïakren bad u Bah Jop Pyrbot uba dei u Rangbah Shnong ka Lower Mawprem lyngba ka phone, u la ïathuh ba katei ka jingmeh ding ka dei beit thik na utei ‘Transformer’ uba don ha katei ka jaka. Kumta na ka liang ki kali pynlip ding ki la wan her bak sha katei ka jaka ban tem noh ïa katei ka ding na ka jingpur sha ki dukan bad ki jaka kiba don ha syndah jong utei u ‘Transformer’.
U Bah Pyrbot u la ïathuh ruh ba na ka liang jong ka shnong ka la leit sha katei ka jaka ban khmih dalade ïa ka jinglong jingman jong katei ka jingmeh ding bad ym shym la don satia kano-kano ka jingmynsaw ne kano-kano ka jingjia kaba sngewsih.
