Shillong, Naiwieng 22
U tyngshop pynsammut ïa ki paidbah u Bah Sunday Salahe u la ïathuh ba ha ka phlim ‘Skap the brother of skop’ u shim ïa ka bynta ban ak na nongkyndong hynrei u wan shaduh Shillong ban wad ïa ka puron ka Regina Lamo namar ka jingpawnam, pynban ynda u la ïakynduh um tip ba ka dei kaba la don lok lypa.
Kane ka phlim ka dei kaba la dep ïoh syrnot na Guwahati bad mynta ka dang ap pali ha Bijou Cinema Shillong ban ïoh pyni noh sha ki paidbah.
Ïa kane ka phlim la ak da ka Regina Lamo, Phira Dohtdong, Sunday Salahe, Jimmy Wann, Margarita Kynjin. La pynwandur da u Bah Ebormi Muksor bad la dei trai da u Bah Ebormi Muksor bad Margarita Kynjin.
Haba ïakren bad u Bah Sunday u la ïathuh ba ïa kane ka phlim la sdang ban ringdur ha u snem 2019 hynrei ka la bam por bha namar ki kwah ban leh bha.
Nangta ha kane ka phlim u la ïathuh ba la kren ha ka ktien Pnar bad Khasi, hynrei um poi pyrkhat haba u peit ha social media ba ka puron ka long shisha kaba bhabriew haduh ba un wan wad sha Shillong, pynban kaba pynsngewsih ka long ba ynda u la ïakynduh ka dei ka briew kaba la don lok.
U la ïathuh ruh ba kane ka khana ka dei shaphang kawei ka shnong ha nongkyndong ka bym pat don surok bym pat don bording haba ki briew ki poi sha Shillong ki ang lyngngoh haba ki ïohi ïa ka jingthaba ki jingshai na ki ïing briew.
Shuh shuh u la ïathuh ba kane ka khana ki paidbah kin sa phuh rkhie ïa u Skap bad u Skop ynda ki la wan peit ha cinema.
Haba ïakren bad ka Regina Lamo ka la ïathuh ba ha kane ka phlim ka la ïakynduh ïa u Bah Sunday; u briew uba lyngkot, hynrei kam sngewpher namar ha ka pyrthei ki don ki briew kiba ïakynduh lada ka kynthei ka jrong bad u shynrang u lyngkot.
Ka la ïathuh ba ha kane ka phlim ka ak kum ka lok jong u Phira Dohtdong, hynrei u Bah Sunday u itynnad ïa ka haba u ïohi ha lynti bad khatduh ka la hap ban shimti ïa u Bah Sunday kum u lok ynda la kut ka jingïashoh.
Ka la pyntip katba ka dang biang ka por ban ak phlim, kan bteng beit lada ki nongpynmih phlim ki dang khot namar kane ka dei ka sap ba ka don.
