Shillong, Naiwieng 22
U President ka National People’s Party (NPP) Meghalaya u Bah Prestone Tynsong u la pyntip ba ka seng ka la dep ban phah ïa ki ar tylli ki kyrteng jong ki kyrtong ban ïakhun ïa ka ilekshon MP bad mynta ki dang ap ban ïoh ka jingmynjur na u President rangbah ka NPP.
“Ngi la dep ban phah ïa ka kyrteng jong ki kyrtong ban ïakhun ha ka ilekshon MP ka ban sa long ha u snem ban wan na Shillong bad Tura Parliamentary Konstitwensi sha ki khlieh nongïalam bad mynta ngi dang ap ban ïoh ïa ka jingmynjur na u National President ka NPP u Conrad K Sangma,” la ong u Bah Prestone Tynsong haba kren sha ki lad pathai khubor ha ka Sngi Balang hadien ba la wai ka jingïashong jingïalang ba nyngkong eh ka Executive Committee ba thymmai.
U Bah Prestone u la ong, “Ngi khmih lynti ba hapoh kane ka taïew, shisien ba la ïoh ïa ka jingmynjur na u National President halor ki kyrtong kiba la pan tiket na kitei ki ar tylli ki konstitwensi, ngan sa pyntip sha phi ïa ka rai”.
Lah ban pynkynmaw ba ha kaba sdang la sawa ka kyrteng u Bah HM Shangpliang bad hadien kata u Bah Dasakhiat Lamare kiba la pan tiket na ka NPP. Katkum ki tyllong khubor ki la paw ba ka tiket ka lah ban leit sha ka Kong Ampareen Lyngdoh kaba dei ruh ka Myntri hapoh ka Sorkar Jylla.
U Bah Prestone u la pyntip ba ki la don ym duna ïa ka 5 bad 6 ngut kiba la pan tiket na Shillong Parliamentary konstitwensi, hynrei um shym la treh pat ban pynpaw ïa ka kyrteng jong ki nongpan tiket ban ïakhun ïa ka ilekshon MP kiba la phah da ka komiti ban ïoh ïa ka jingmynjur.
“Sngewbha wat nym pynkohnguh ïa nga halor kane namar ba kane ka kam ka dang long ka bym pat long ban ïathuh briew, tat haduh ban da ïoh shwa ïa ka jingmynjur na u National President, kumta ngam lah ban kren eiei halor kane,” la ong u Bah Prestone.
