Shillong, Naiwieng 22
Saw tylli ki projek ha kane ka Jylla kiba la jied ban pynitynnad shuh shuh bad ban kyntiew ruh ïa ka kam jngohkai lyngba ki jaka mane blei ki la rung na ka bynta ban pyntrei. Ïa kine ki projek yn pyntrei lyngba ka skhim PRASAD lane ‘Pilgrimage Rejuvenation And Spiritual Augmentation Drive’ jong ka Sorkar Pdeng.
Kine ki projek ki hap hapoh ka skhim PRASAD jong ka tnat jngohkai pyrthei ka Sorkar Pdeng kaba la sdang pyllait naduh u snem 2014-2015.
Kane ka skhim ka dei na ka bynta ban pynitynnad ïa ki jaka leit riewblei (pilgrimage sites) ha ka ri India baroh kawei na ka bynta ban kham pynkiew ruh ïa ka kam jngohkai lyngba ki jaka mane blei, namarba ka jingkiew ha ka liang ka jingdon ki nongjngohkai hapoh ka ri ruh ka dei lyngba ki jaka leit riewblei kiba don ha kylleng ka ri.
Kine ki saw tylli ki projek ha Meghalaya ki long ka Nongsawlia Presbyterian Church ha Sohra, ka Nartiang Shakti Peeth bad ka Pung Aitnar kaba ju pynlong ïa ka jinglehkmen Behdeiñkhlam ha Jowai bad ka Charantala Kali Temple ha West Garo Hills district.
Ïa kine saw tylli ki projek la pyllait ha ka 11th International Tourism Mart kaba long ha Mawdiangdiang kaba don kham pajih na nongbah Shillong.
La ong ba lyngba kane ka skhim PRASAD jong ka Sorkar Pdeng la mang na bynta phra tylli ki projek ha North East bad ka jingmang pisa ka long T.256.45 klur.
Ka Durga Temple ha Nartiang ha Jaiñtia Hills ka dei kaba la don kumba 500 snem bad ka dei kaba khring bha ïa ki nongleit riewblei na kylleng ka ri.
Ka Nongsawlia Presbyterian Church, ka dei kaba la tei ha u snem 1846 da u Thomas Jones, bad ka dei kawei na ki Ïingmane ba la rim tam ha North East India.
Ka Pung Aitnar ka dei ka jaka kaba kongsan tam na ka bynta ka jinglehkmen Behdeiñkhlam ha Rilum Jaiñtia katba ka Charantala Temple ha West Garo Hills ka dei kawei na ki jaka mane jong ki jaitbynriew Hajong bad Koch kaba la khring bha ruh ïa ki briew na shabar ban wan jngohkai bad leit riewblei.
