Shillong, Naiwieng 22
Ka kynhun ki nongkitkam na ka Head Office, Shillong hapoh ka jingïalam u Bah Tonyford War, President bad Bah F.C. Shullai, General Secretary jong ka APSTA ka la lum ïa ka jingïalang ha ka 18 tarik mynta u bnai ha Sajer Committee Hall, Ïing Dorbar Nongpoh, ha kaba ïadei bad ki nonghikai Sorkar bad Deficit Lower Primary School kiba hap hapoh ka jingpeit bad jingpynïaid ka ophis u SDSEO, Nongpoh.
Ïa ka jingïalang la pynïaid da u Babu H.S. Syngkli, President, Nongpoh APSTA Unit.
Ha kane ka jingïalang la ïatai ïa ka jingeh kaba ki nonghikai hapoh ka Nongpoh SDSEO ki ïakynduh kum ka jingbym ïoh ïa ka tulop kaba tikna, ka jingbym lah ban phah ïa ka tulop ki nonghikai ‘Deficit’ sha ka ‘Personal Account’, ka CPF bad DCRG jong ki nonghikai ba la shongthait, ka baibam jong ki nonghikai ba la shongthait, ka N.P.S. ka jingpynskhem kam nalor kiwei-kiwei.
Ha kane ka jingïalang, la ïoh ïa ka jingkren pynshai na u Babu Tonyford War, President ka seng uba la batai kumno ki nonghikai skul ha ka por ba ki dang don ha District Council ki mad ïa ka jingeh ha kaba ïadei bad ka tulop bad kumno pat ki kylla long ki nonghikai Sorkar namar ka jingtrei shitom ka APSTA bad AMPSTA.
Na ka liang u General Secretary, Babu F.C. Shullai u la ai jingkren shibun kiba ïadei bad ka jingmyntoi jong ki nonghikai bad khamtam haba ïadei bad ka jingmyntoi hadien ba la shongthait jong ki nonghikai Sorkar bad ‘Deficit’.
U pynshai ruh ba ki nonghikai Sorkar jong ka thup 2010-2011 kiba la ïasnoh bad ka APSTA/AMPSTA ki dei ki dkhot ba pura jong ka MGPSTA, hynrei ba ki kyntait ban ïarap ïa ki na ka jingshah weng kam, ka APSTA/AMPSTA ka la lah ban pynneh ïa ka kam jong ki da kaba jop ïa ka mukotduma.
Hadien katei, u Babu Shullai u la pynsngew ba ka jingïalang ka la shim ïa ka rai ban thoh sha ka Sorkar ban pyndap ïa ki kam kiba lait ha ka ophis SDSEO, Nongpoh na ka daw ka jingshongthait jong katto-katne ngut ki nongtrei bad ka kam ka sahkut ha ki almari.
Ka jingïalang ka la rai ban dawa ruh na ka Sorkar ban pyntreikam ïa ka ACPS jong ki nonghikai kiba dei hok ban ïoh, kumjuh ïa ka CPF bad N.D.C.P.S, DCRG.
Shuh shuh la rai ba kito ki nonghikai ki bym pat ïoh ïa ka jingpynskhem kam, ki Secretary Unit kin shim jingkheiñ, bad ynda la ïoh ka Head Office kan sa ïakynduh shuwa ïa SDSEO, Nongpoh shuwa ban ïaid sha ki bor ba halor.
Na ka liang ka jingïalang ka la rai ruh ba lada jia ba kitei ki jingdawa ki sahkut, kata ka Head Office kan shim rai ban pynlong da ki jingïakhih ban dawa ïa kaba dei hok ban ïoh.
Ha katei ka sngi, ki la don 200 ngut tam ki nonghikai kiba la wan poi sha katei ka jingïalang. Kane ka long ka kyrwoh na u General Secretary ka APSTA, Babu F.C. Shullai.
