Shillong, Naiwieng 23
Hadien ba mih ka khubor ha kaba la kynnoh ba u Assistant Director of Physical Education & Sports u Nantu Das u la jrongkti bad thmu leh kam sniew ïa kawei ka referee dang shen, na ka liang ka skulbah North Eastern Hill University (NEHU) ka la weng kam noh shipor ïa u Das.
Da ka hukum u Registrar in-charge ka skulbah ba 22 tarik Naiwieng 2023, la ong, “U Nantu Das u la dei ban shah weng kam shipor naduh ka sngi ba u shah set ha along kata ka 19 tarik Naiwieng 2023 katkum ka Sub-rule (2) of Rule 10 jong ka Central Civil Service (Classification Control and Appeal) Rules, 1965, bad un don hapoh ka jingshah sospon tat haduh da pynmih da kawei pat ka hukum”.
Lah ban pynkynmaw ba katkum ka khubor kaba la mih, u Nantu Das u la shah kynnoh ba u la pyrshang ban thombor bad leh be-ijot ïa kawei ka referee phutbol hapoh ka Kiang Nongbah Old Guest House ha ka Sngi U Blei jong ka taïew ba la dep.
Hadien ba la ujor da ka ejahar, la kem noh ïa u Nantu Das ha ka 19 tarik mynta u bnai bad haduh mynta u dang don hapoh ka along ki pulit.
Lah ban pynkynmaw ruh ba katei ka referee ka dei kaba la kyrpad da ka NEHU ba kan leit synran ïa ka kynhun ïalehkai phutbol ki kynthei jong katei ka skulbah, ki ban ïashimbynta ha ka lympung Inter-University ka ban long ha Odisha ha ka taïew ban wan.
