Tura, Naiwieng 23
Ka seng AHAM ha West Garo Hills ka la pynpaw ïa ka jingsngewkhia halor ka jingkyntait jong ki jaka kynshew pisa (Bank) ban shim ïa ki kot ki sla na ki briew kiba kwah ban seng kam seng jam hapoh ka Pradhan Mantri Formalization of Micro Food Processing Enterprise Scheme (PMFME) kaba dei na ka Sorkar Pdeng.
“Ka thong jong katei ka skhim ka long ban kyntiew ïa ki kam kiba ïadei bad ka jingsaiñ ïa ki marrep khnang ban ïarap ïa ki thaiñ nongkyndong bad kumjuh ruh ban ai kam ai jam ïa ki briew,” la ong ka AHAM.
Nalorkata, ka la ong ba ki la don bun ngut ki briew kiba la pyntip ba ki Bank ki la kyntait ban pdiang ïa ki kot ki sla ha ka por ba ki la kwah ban ïoh jingïarap lyngba katei ka skhim. Ka la ong ba ka jingkyntait ban pdiang ïa kine ki kot ki sla ka ktah jur ïa kito kiba kwah ban shim jingïarap katkum ki kyndon jong ka skhim.
Na ka liang ka AHAM ka la kyntu ïa ki bor ba dei khmih jong ka tnat Horticulture ba kin shimkhia halor kane ka jingbym treh ki Bank ban pdiang ïa ki kot ki sla.
