Shillong, Naiwieng 23
Ki nongïalam bad dkhot jong ka Khasi Students’ Union (KSU) ha ka Sngi Palei ki la leit ban phah khang noh ïa ki ophis, ki bank bad ka jaka pule kiba khlem burom ïa ka jingrakhe ïa ka Seng Kut Snem da kaba plie bad long trei.
Lah ban pynkynmaw ba na ka liang ka sorkar jylla ka la pynbna da ka shuti ha kane ka sngi rakhe ïa ka Seng Kut Snem kaba ju long man la u snem. Kumta la sakhi ruh ba man la u snem ki ju don beit ki ophis ne ki bank kiba ju plie ha kane ka sngi.
Kane ka jingleit khang ka KSU da lade ïa kine ki jaka trei kiba la plie ha kane ka sngi ka la long ha kylleng ki bynta jong ka nongbah bad wat sha kiwei ki district ruh.
Ki nongïalam ka KSU Mawlai Circle ha kane ka sngi ki la leit bad phah khang noh ïa ki ophis treikam bad ki bank kiba plie khlem da burom lem ïa ka sngi shuti jong ka jylla.
Kumjuh na ka liang jong ki nongïalam ka KSU Shillong Mihngi Circle ki la leit ban khang ïa ka NIFT bad ka NEIAH kiba don ha Mawdiangdiang. Bad na ka liang jong ka KSU Mairang Circle ruh ka la leit ban phah khang noh ïa ka Post Office kaba don ha Mairang kaba la plie bad treikam.
