Jowai, Naiwieng:
Shibynta ban pynshlur bad ai mynsiem ïa ki nongrep ban shim ïa ka kam rep kam riang kum ka lad kamai ka ban pyndap bad kyntiew ïa ka ïoh ka kot jong ki, ka shlem treikam jong u District Horticulture Officer, West Jaiñtia Hills ha ka 22 tarik Naiwieng ka la pynlong da ka rynsan pyni nam kaba tip kum ka ‘Horticulture Exhibition’ kaba hap hapoh ka Mission for Integrated Development of Horticulture (MIDH) 2022-2023.
Ki nongrep na kylleng ki shnong jong ka District ki la wanrah ïa ki mar rep bapher bapher ba la bynta ha la ki jong ki jong ki kyrdan jong ki mar rep ba kynthup naduh ki jhur ki jhep, ki soh ki pai, ki syntiew ki skud bad kiwei kiwei ki mar rep ba la pynlong ha madan Marian Hill Higher Secondary School, Jowai.
U District Horticulture Officer, West Jaiñtia Hills u Bah S Rani u la ong, ka jingthmu jong kane jingpyni nam ka long shibynta ka jingïakynduh lang jong ki nongrep bad ban ïaphylliew jingmut para nongrep khnang ban tip shuh shuh ïa ki lad ki kabu kumno ban pynbha shuh shuh ïa ka kam rep.
U MLA ka Jowai u Bah Wailadmiki Shylla kum u kongsan ha ka jingkren u la ong ka Jylla Meghalaya haduh kine ki sngi ka dang shaniah na kiwei ki Jylla kynthup naduh ka bam ka dih bad kiwei kiwei ki jingdonkam.
U la ong kumba long mynta ki don ki nongrep kiba long nongrep tang kat ban ïoh skhim sorkar hynrei ki khlem wad ki lad ki lynti kumno ban pynheh pynïar ïa ka rep ka riang ka jong ki. Kumta u la kyntu ïa ki nongrep ban pynheh pynïar ïa ka kam rep bad ban shim ruh ïa ka kam rep kum kata ka lad kamai ka ban kyntiew ïa ka ïoh ka kot jong ki bad ka jylla.
Nalorkata, u la ong ba don ki kmie ki kpa kiba don ïa ki khun kiba la nang la stad hynrei kim ju pynshlur ïa ki ha ka kam rep. Ha kane ka juk kyrduh kam u la kyntu ïa ki kmie ki kpa ban hikai bad ailad ïa ki khun ban shim ïa ka kam rep kum kawei na ki kam kaba ki lah ban ïeng ha la ki kjat lajong khlem da khmih lynti ne shaniah tang ha ki kam sorkar.
Ka Kong DC Sohtun, MAS Director of Horticulture, Meghalaya Shillong ka la kyntu ïa ki paid nongrep ba lada kino kino ki jingeh ha ka liang ka rep ka riang kim dei ban lehraiñ ban leit pan jingpynshai na ki ophis sorkar bad ha kajuh ka por ka kyntu ban shim kabu ïa ki skhim sorkar bapher bapher ki ban pynmyntoi bad kyntiew ïa ka ïoh ka kot ka jong ki.
Kiwei pat kiba la ai jingkren ki long ka Kong DV Lyngdoh, ADC West Jaiñtia Hills District, u Bah R Lamare Assistant Director of Horticulture West Jaiñtia Hills District, u Foster Kharsohnoh Progressive Farmers West Jaiñtia Hills District, u Mutshwa Thabah Vice Chairman EARMACS ha ka jingïalang kaba la pynïaid da ka Kong Risakaru Lyngdoh SMS (Agronomy) bad u Mebanphikir Kharbuli Farm Manager KVK.
