Shillong, Naiwieng 23
Ki paidbah da ki hajar ngut ki la tuid ban ïashim bynta ha ka jingrakhe ïa ka Seng Kut Snem kaba 124 ba la pynlong da ka Seng Khasi Seng Kmie ha ka Sngi Palei ha madan Weiking, Jaïaw. Kane ka jingrakhe kaba shisien shisnem ka la long kaba iphuh-iphieng bad kaba ishongkun bha.
Ïa kane ka jingrakhe la sdang da ka nguh ka dem blei ha madan Ïewrynghep, Laitumkhrah. Hadien kane la pynlong ïa ka shad bad pynbud pat da ka jingïaid paidbah ryngkat ka put ka tem na madan Ïewrynghep shaduh madan Weiking. La pynphuh pynphieng ïa kane ka jingïaid kjat, da ka jingpyni nam ïa ki tabut ne Tableau kiba la shna ha ki rukom bapher bapher kiba ïadei bad ka jingngeit tynrai u Khasi.
Hadien ka jingïaid pyni riti da ka jingïaid kjat la bud pat sa ka jingïalum paidbah ha madan Weiking ha kaba la wan ban ïashim bynta lang da u CEM ka KHADC u Bah Pynïaid Sing Syiem, u Justice HS Thangkhiew Acting Chief Justice ka High Court Meghalaya, u Syiem ka Hima Khyriem u Pa’iem Balajied Sing Syiem, u Syiem ka Hima Mylliem u Pa’iem Ainam Manik Syiem, u President ka Seng Khasi Kmie u Rgh Oplysor Pyngrope lem bad kiwei kiwei.
Ka jingrakhe ïa ka Seng Kut Snem ka long kum ka jingkynmaw burom ïa ki 16 ngut ki rangbah mynshwa kiba la ïeng ban ïada ïa la ka jong ka jaidbynriew na ki tyrsim ka jingma jong ka ‘erïong ‘erngit kaba la wan ban beh kyrthep bad sdang ruh ban rah ban rong noh wat ïa ki tynrai jong ka jaidbynriew. Dei ruh ha kane ka sngi ba ka jaidbynriew ka la sei ïa ki rangkynsai ki rangdajied ban ïada na ka jingwan tyllep u lyoh ba dum bad dei kine ki rangbah kiba pynkhie im bad pynkyndit bynriew ïa u Khasi lyngba ka bor pyrkhat bad jingïohi jngai jong ki ban ïaleh pyrshah ïa ka jingthombor u nongwei, ban pynduh pyndam ïa ka jingngeit niam, ngeit rukom bad riti dustur Khasi.
Hadien kane ka jingwan ïaid kjat na Ïewrynghep, ki rangbah ka seng ki la pynlong ïa ka duwai ka phirat ha ka ïing seng ha Mawkhar. Hadien kane pat, ki la mih ban hiar sha lympung Weiking Jaïaw ban pyndep ïa ka leh niam leh rukom ban ainguh ïa U Blei nongbuh nongthaw.
Haba kren sha ki lad pathai khubor, u Assistant General Secretary ka Seng Khasi Seng Kmie u Rangbah Païa B Synrem u la ong ba kane ka jingrakhe ïa ka Seng Kut Snem ka dei ruh ban ainguh ïa U Blei uba la kyrkhu ïa ki khun ki hajar lyngba ka jingbha ka kamai ka kajih.
