Tura, Naiwieng 23
Ka tnat khlaw na Williamnagar ha East Garo Hills ryngkat bad ki dkhot ka AHAM ha ka miet Sngi Balang ki la ïoh ban kurup ïa ki dieng ba la pynkhyllem be-aiñ na Reserve Gittim, Nengsila.
Ïa kine ki dieng ba la pynkhyllem be-aiñ la ïoh ban kurup ha ka por kumba 10:30 mynmiet na ka ïing sah jong uwei u briew ba la tip kyrteng kum u Pentom Momin.
Haba pyntip halor kane, ka AHAM ka la pynpaw ba kan ai jingkyrshan ïa ka tnat khlaw ban kurup ïa ki dieng ba pom be-aiñ.
“Ka jingpynkhyllem bad jingkhaïi dieng be-aiñ kam pynsyllen tang ïa ki khlaw, hynrei ka long pyrshah ruh ïa ki kyndon aiñ, bad ka pynduh khajna ïa ka sorkar. Ngin bteng ban ai jingkyrshan ïa ka tnat ban ïada ïa ki khlaw ki btap ha Rilum Garo,” la ong ka AHAM.
