Tel Aviv, Naiwieng 23
Ki shipai Israel ki la bteng ban ther ïa ki shlem jong ka Hamas ha Gaza Strip ha ka Sngi Palei.
La ïathuh ba ki shipai kiba la leit tur sga Gaza Strip ki la ther ïa ki shlem jong ki lehnoh ha Jabaliya. Ka la don ruh ka jingther da ki ‘Drone’ ïa shi kynhun ki lehnoh kiba la thmu ban thombor ïa ki shipai. Lyngba ka ‘Drone’ la ïoh ruh ban ther ïa ka jaka peitngor ki lehnoh Hamas kaba la buh jingma ïa ki shipai Israel.
Ha kawei pat ka jaka kaba don ha ka thaiñ Shatei jong ka Gaza, la ïoh ban thombor ïa kiba bun bah ki shlem jong ki lehnoh Hamas da kaba siat na ki tup ki man bad ki ‘Drone’.
Ki shipai ki la lap ruh ïa ki jaka rung jaka mih kiba don hapoh sla ryngkew ha kawei ka jaka mane ki Muslim, jaka sah briew, bad ka jaka rep ha Beit Hanoun. La ong ruh ba la lap shibun bah ki tiar siat na kata ka ïing briew.
Katkum ka jingïathuh jong ki shipai Israel, ha ka shi sngi, la ïoh ban ther ïa palat 300 tylli ki shlem jong ka Hamas ba kynthup ki shlem jong ki ‘riew kieng atiar, jaka rung jaka mih ba hapoh sla ryngkew, jaka buh tiar siat, jaka shna tiar siat bad kiwei.
