Shillong, Naiwieng:
U tyngshop uba dei na South Indian u Hemanandh Velayudham u la jah lynti haba u wan poi sha Shillong hadien ka khlam COVID-19 bad u la ïoh ban leit pan jingïarap na kawei ka dukan sha.
Ïa kane ka phlim kaba une u tyngshop na South Indian uba dang thymmai u la ak ha Shillong ka dei kaba la ai kyrteng ‘Ka Café Dukansha’ ka ban sa pyllait paidbah ha ka 24 tarik mynta u Naiwieng 2023 ha Anjalee Galaria Cinema Shillong ha ka por 5:30 janmiet man ka sngi.
Kaba sngewtynnad ba ha kane ka phlim kumba 70 percent ki dei ki samla Khasi kiba la shim bynta kum ki puron bad kiba ak tyngshop synran bad 70 percent eiei la ringdur ha ri Khasi ka ban sa pyllait paidbah ha ki cinema ha ka ri India ha ka ktien Hindi.
U tyngshop synran uba la ak ha kane ka phlim u dei u Hrisami Passah bad ar ngut ki puron ka Svetlana Wankhar bad Cathleen Maya Laloo.
Katba u Bah Meshach Nongsteng u la long kum u director, ki trai pat ki don lai ngut, kata ki long Kong Monica Rynjah, u Neresh Kumar Sirpaul, Hemanandh Velayudham u ANurag Jain kum u Co-Producer bad Srinath Pitchai kum u nongringdur bad nongpyndait ïa ki video.
Haba ïakren bad u tyngshop synran u Hsami Passah u la ïathuh ba u la ak ha kane ka phlim kum u trai ka restaurant ban ïarap ïa une u tyngshop na South India uba la poi sha Shillong hynrei u la jah lynti noh haba u wan kai mar shu kut ka khlam COVID-19.
Ngam da tip bha balei u jah lynti namar nga dei tang u tyngshop synran hynrei kito ki ar ngut ki puron kiba la ak kin sa batai bniah ynda ki paidbah ki la peit ha ka phlim.
U don jingkyrmen ba ka ri Khasi kan sa khring shuh shuh ïa ki nongjngohkai pyrthei ynda la pyllait ïa kane ka phlim namar kiwei ki jaidbynriew kin sa ïohi ïa ka jingitynnad ki jaka.
Haba ïakren bad ka puron ka Svetlana Wankhar, ka la ïathuh ba naduh ba ka la ïoh ban ak nyngkong ha ka music video ‘Shaduh Bakut’ ba la pynmih da u Bah Meshach Nongsteng ka la ïoh ka lad ban ak ha kane ka phlim.
Ka la ïathuh ba ki jaka ba kane ka phlim ka la ïoh ban ringdur ki long ka Dawki bad Kongthong bad kiwei de ki bynta ha Shillong.
Ka la ïathuh ba ha Anjalee Cinema ïa kane ka phlim yn kren da Khasi bad ynda la pyni sha kiwei ki jylla yn kren da ka Hindi.
Shuh shuh ka la ïathuh ba ka bynta ban ak ha kane ka phlim ka shim kum kawei ka nongai pisa ïa ki briew kiba kwah ban seng kam.
