Shillong, Naiwieng 23
Ka jingshah tuh jong ki thuk-thuk na rilum Garo ka la sdang kynrei biang bad tang hapoh ka shi bnai ka la don ka jingshah tuh haduh 3 tylli ki thuk-thuk.
Kawei napdeng kitei thuk-thuk kaba la shah tuh ka dei na kawei ka ïing ha ka shnong Dadenggre ha West Garo Hills. Kham ha shuwa kane la don ka jingshah tuh jong 2 tylli ki thuk-thuk bad ïa kane la pynthikna da ki pulit ka Tura.
Lah ban pynkynmaw ba ha u snem ba la dep bun tylli ki thuk-thuk bad haduh 4 tylli ki kali Pick-Up ki la shah tuh bad ha man ka taïew kan don beit ka jingshah tuh kali.
Ki thuk-thuk kiba shah tuh ki kham dei jong ki kompeni Bajaj Pulsars. Ïa kine la khaïi tuh sha Bangladesh bad ïa ki kali Mahindra SUV Bolero bad Pickup la kit sha Assam bad Nagaland.
Ha ki bnai ba la dep, ki pulit ki la ïoh kem ïa ka kynhun nongtuh bad la ïoh jingtip ba kane ka kynhun ka don ruh sha Assam.
