Shillong, Naiwieng 23
Ka jingpynkhreh ban thaw ïa ka Police Commissionerate ha nongbah Shillong ka la nang ïaid shaphrang namar ka kane ka nongbah ka la ïar katba nang ïaid ki snem.
Katkum ka tyllong khubor, la ong ba ka tnat pulit ka dang pynkhreh ïa ki jingdonkam na ka bynta ban thaw ïa ka Police Commissionerate ha kane ka nongbah bad ynda la dep lut ki jingpynbit pynbiang khamtam ka jingdon ki pulit (man power) yn sa phah ïa ka jingtyrwa sha ka Sorkar Jylla ban khmih bniah bad ban ai ka jingmynjur.
“Ynda la biang ka jingpynkhreh bad ynda la khmih bniah yn rah ïa ka jingtyrwa sha ka Kynhun Myntri ban ai ka jingmynjur ban thaw ïa ka Police Commissionerate,” la ong ka tyllong khubor.
Haba kylli shaphang ka jingtreikam bad ka jingdon briew ynda la thaw ïa ka Shillong Police Commissionerate, ka tyllong khubor ka ïathuh ba ïa ka Police Commissionerate yn sa khlieh da u Commissioner of Police (CP) ha ka kyrdan IPS ha kaba yn sa don ruh kiwei ki pulit ophisar ha la ki jong ki kyrdan.
La ong ba hapoh ka Police Commissionerate kin sa don ki Zone lem bad ki Deputy Commissioner of Police.
Kumba ka long mynta ka tnat pulit ha nongbah Shillong ka don u Superintendent of Police (SP) Shillong City bad namar ka jingïar ka jaka, ka la kham shitom ban peit ïa ki thanat kiba don ha nongbah Shillong tang u SP (city).
Ki thanat ha nongbah Shillong ki kynthup ïa ka Laban, Sadar, Laitumkhrah, Lumdiengjri, Mawlai, Rynjah bad Madanrting, bad kine ki thanat ki la don ruh bun tylli ki police outpost.
