Shillong, Naiwieng 23
U Chairman ka Art & Culture Committee jong ka Seiñ Raij Jowai u Bah Chandlok Dkhar u la kynthoh da kaba tyngeh ba lada ki District Council kim lah ban ïada ïa ki riti dustur, la dei ban pynduh noh ïa ki.
U Bah Chandlok u la kynthoh ïa kane ha ka Sngi Palei haba ai jingkren ha ka jingrakhe ïa ka Seng Kut Snem ha madan Weiking, Jaïaw.
Une u nongïalam ka Seiñ Raij Jowai u la kynthoh da kaba tyngeh da kaba ong ba la donkam ïa ka seng ba kan shong bad don noh hapoh ka district council ban pynneh ïa ka riti ka dustur.
Shuh shuh une u rangbah u la kynthoh da kaba tyngeh da kaba ong ba lada pyrkhat ka jingdon jong ki district council ka long ban peit bad ïada ïa ka riti ka dustur ka khyndew ka shyiap, hynrei kumba ka paw mynta hangno kine ki district council ki la pynneh ïa ka riti ka dustur bad ha kaba ki la die lut ïa ka riti ka dustur.
Ha kajuh ka por u Bah Chandlok u la ong hangno kata ka council ka ïada ïa ki riti dustur namar la ju ïohi ba haba ki ïaleh ilekshon tang ban ïoh long MDC bad tang ban ïoh bamsap.
U la ong ruh ba lada ka District Council kam lah ban ïada ïa ka riti ka dustur ka la dei ka por ba kin hap ban tied noh ïa ka jingkhang jong ka ïingbishar ne wat ban leit shaduh Delhi ban dawa pynduh noh ïa ka district council bad ban aibor pat ha ka seng na ka bynta ban ïaleh ban ïada pynneh ïa ki riti dustur bad pynkhie im biang ïa ka jaidbynriew.
