Shillong, Naiwieng 23
Ka Myntri ka tnat ka Koit ka Khiah ka Jylla ka Kong Ampareen Lyngdoh ha ka Sngi Palei ka la hiar ban leit jngoh ïa ka Health Camp ba la pynlong da ka Fanwar Faith INC ryngkat ka jingïatreilang bad ka Martin Luther Christian University (MLCU), Jengjal Sub Divisional Hospital, RoUTES bad ka Seventh-Day Adventist Church ha Madan PyndengMawlieh, Mawshynrut, West Khasi Hills District.
Ha kane ka jingleit jngoh, ka Myntri ka la leit jngoh ïa ki booth bapher bapher ba la pynïeng ha kane ka jaka bad ruh ban ïoh ïakren bad ki doktor, ki nongtrei ka tnat ka koit ka khiah, ki nongai dawai bad kito kiba ïoh jingmyntoi na kane ka prokram ai jingsumar bad dawai ei.
Haba ai jingkren ha kane ka sngi, ka Myntri ka la ai khublei ïa ka Fanwar Faith INC bad ïa kiwei kiba la wan shakhmat ban pynlong ïa kane ka prokram kum shi bynta ban pynïoh ïa ka koit ka khiah sha ki nongshong shnong ha ki jaka ba kyndong bha.
Shuh shuh na ka liang jong ka Myntri ka la ai khublei ruh ïa ka Kur Mawsor kaba la kloi ban aiei ïa ka bynta jong ka jaka na ka bynta ban tei ïa ka ïing skul hapoh ka shnong ka ban lamkhmat da ka Fanwar Faith INC.
Ha ka jingïakren bad ki doktor ha kane ka jaka, la pyntip sha ka Myntri ba ka jingpang shini (Diabetes) bad ka jingpang kiew snam (Hypertension) ki long kiba jur bha hapdeng ki nongshong shnong. Halor kane, ka Myntri ka la kyntu ïa ki nongshong shnong ba ki dei ban leit phah peit man la ka por ïa la ka koit ka khiah sha ki jaka ai jingsumar kiba don hajan.
