Gaza, Naiwieng 23
Ka jingpyllait ïa ki katto katne ngut ki briew kiba la shah rahbor sha Gaza kan sdang ha ka step Sngi Thohdieng, la ong u nongaiktien ka tnat bar ri jong ka sorkar Qatar.
“Ka jingsangeh ïasiat kan sdang ha ka por 7:00 baje mynstep ha ka Sngi Thohdieng…bad ka kynhun banyngkong jong ki riew paidbah kiba la shah rahbor kin lait ha ka por kumba 4:00 baje janmiet ha kajuh ka sngi,” la ong u Majed Al-Ansari ha ka Sngi Palei.
Ha ka banyngkong, kin don 13 ngut ki briew ki ban shah pyllait ba kynthup ïa ki kynthei bad ki khynnah kiba dei na kajuh ka longïing longsem, la ong u Ansari. Hapoh ki saw sngi ki ban wan, kin don 50 ngut ki briew kiba la shah rahbor ki ban sa shah pyllait, u la bynrap.
Ka Israel bad ka Hamas, kiba la don hapdeng ka thma naduh ka 7 tarik Risaw, ki la pynbna ha ka Sngi Balang ba ha ki saw sngi ban wan, yn pyllait ïa 50 ngut kiba la shah rahbor bad ha kajuh ka por, yn pyllait ïa bun ngut ki nong Palestine kiba la shah kem.
Ïa kane ka jingïasngewthuh jingmut hapdeng ka Israel bad ka Hamas la leh da ka Qatar, Egypt bad ka United States. La thmu ruh ban ai jingïarap ïa ki 2.4 million ngut ki nongshong shnong ka Gaza.
Kane ka jingïakut hapdeng ka Israel bad ka Hamas ka long hadien bun sngi naduh ba ka Hamas ka la hiar thma ïa ka Israel ha ka 7 tarik Risaw. Ka sorkar Israel ka la ong ba kumba 1,200 ngut ki briew ki la shah pynïap bad kumba 240 ngut ki la shah rahbor ha ka Hamas.
Na ka liang ka Israel ka la khyrwit kylla da kaba ther da ki bom bad haduh mynta, palat 14,000 ngut ki briew ha Gaza ki la shah pynïap bad kiba bun ki dei ki kynthei bad khynnah, la ong ka sorkar Hamas kaba synshar ïa ka Gaza Strip.
