Shillong, Naiwieng 23
U President ka Syngkhong Rympei Thymmai (SRT) Bah Teibor Khongjee, u la ïathuh ba ka seng ka pyrshah jur ïa ka jingtangjait ïa ka kynthei bar jylla lada u shynrang Khasi u ïoh ban shongkha namar long kumba pynkhraw bad leh burom ïa ka.
U la ong ka SRT ka ïeng ha ka nongrim ban pynkhlaiñ ïa ka jaidbynriew ban sdang ai jait sha u kpa ban khlaiñ ka ïing ka sem, ka kamai kajih bad kiwei de.
Kumta u la ong ba ka SRT ka pyrshah haba buh ïa ka kyntien tangjait ha ka The Khasi Social Custom of Lineage Act 1997 namar kumno yn pynkhraw ïa ka jait jong ka briew ka bym dei Khasi.
U la ong ba lada ai jait sha u kpa ym donkam ban tangjait hynrei ka jait kan leit beit sha u kpa.
Shuh shuh u la ong ba na ka daw ka tangjait ki la poi palat shiphew hajar tylli ki jait ha rilum Kha-si, katba ha rilum Jaiñtia kam ju don ka tangjait.
Ha kajuh ka por u la pyntip ba ha ka SRT lada ka kynthei ka ïoh lok ïa u shynrang u bym dei Khasi ka hap ban pyndem beit ha u shynrang ban ai jait sha u.
Nalor kane u Bah Teibor u la pyntip ba ha kine ki snem kiba la leit ki la leit ïakynduh haduh hynriew ngut ki Chief Executive Member (CEM) ka KHADC ban wanrah ha ïingdorbar ban ithuh noh ïa kiba ai jait kum ki Khasi hynrei ym don ba sngap bad baroh ki kyntait beit da kaba ai daw ba kam long namar ka dei ka jaidbynriew ba ai jait sha ka kmie.
“Haduh mynta ka long shiliang namar ïa ngi kiba ai jait sha u shynrang ki kheiñ ba ngim dei ki Khasi, hynrei ngi kwah ban ithuh da ka aiñ ba lada kiba ai jait kpa dei ban ithuh ba ngi dei ki Khasi” u la ong.
Nalor kata, u la ai khublei ïa u Bah Ardent Basaïawmoit ba dei tang ma u uba mih shakhmat ban pynpaw sha ka pyrthei ba dei ban kheiñ kum ki Khasi ïa kiba ai jait kpa.
U la ïathuh ba watla ka KHADC kam ithuh kum ki Khasi hynrei kiba ai jait kpa ki ïoh jingithuh hi kum ki ‘riewlum haba ki leh syrnod na ki shlem treikam ki Deputy Commissioner.
