Shillong, Naiwieng 23
Kum kawei na ki lad ban peitngor ïa ki khynnah skul, ka Dorbar Shnong Mawtawar ka la phah shithi sha ki skul kiba don hapoh ka shnong ban shim ki lad ki lynti ban pyrkhing khnang ban tehlakam ïa ki jingsniew kiba ap-thap ban pynngop ïa ki khun samla.
Ha ka shithi sha ki skul kiba don hapoh ka shnong Mawlai Mawtawar da u Rangbah Shnong bad Secretary Shnong, na ka liang ka shnong ka la pynpaw ka jingsngewkhia hadien ba la ïoh jingtip ba ha kine ki sngi, la don katto-katne ki samla kiba thmu ban pynjot ïa ka lawei jong ki khun kiba dei ki khynnah skul kiba pule ha ki skul bapher bapher hapoh ka shnong da ki jingdih kum u drok bad kiwei kiwei khamtam kum ha kane ka por ba ki dang don ka eksamin.
Kumta la bthah ïa ki skul baroh ban pyrkhing ïa ki khynnah skul ba ha ka por ba ki wan skul bad ynda wai skul namar la ju lap ïa ki khynnah ryngkat bad ka ‘uniform’ sha ki jaka bym dei ban lap.
La kyntu ruh ïa ki skul ban bthah ïa ki khynnah skul ba haba wan sha skul kim dei ban rung sha kiwei pat ki surok dong jong ka shnong bad hadien ba la wai skul, kim dei ban rung sha kiwei pat ki surok dong. Hynrei thik ki dei ban wan bad ïaid sha ïing ba ki shong ki sah lyngba ki surok kiba shngaiñ bad kiba ïaid paidbah.
Shuh shuh ka shnong ka la bthah ïa ki kmie ki kpa ban da wan buh bad wan shaw ïa ki khun, kyrpang ha kane ka por ba don ka eksamin, bad ban phah kyrkieh ïa kane ka jingpyntip sha ki WhatsApp group jong ka skul ban phah lem sha ki skul kiba don ha ka shnong Mawtawar.
Kumta ka shnong ka la ong ba lada lap ïa ki khynnah kiba leh pyrshah, ka shnong kan shim ïa ka kam pyrshah ïa ka skul bad la kyntu ruh ban shimkhia ïa kane na ka bynta ka jingbha ka pateng ki khun jong ka shnong.
La phah ïa ka shithi sha ki khlieh nongpynïaid jong ki skul da u Rangbah Shnong bad Secretary Shnong Mawtawar.
Haba la pyrshang ban ïoh ïakren kham bniah bad ki nongkitkam shnong, ym shym la ïoh wat haba la phone ïa ki.
