Shillong, Naiwieng 24
Ka National People’s Party (NPP) ha ka Sngi Thohdieng ka la pynbna ïa ki kyrteng jong 2 ngut ki kyrtong ki ban ïa aireng ha ka ilekshon ban wan sha ka Lok Sabha.
Ka seng ka la mynjur ïa ka kyrteng jong ka Dr. M. Ampareen Lyngdoh na bynta ka Shillong Parliamentary konstitwensi katba ïa ka Tura Parliamentary konstitwensi, la mynjur ïa ka kyrteng jong ka MP ba mynta, ka Agatha K. Sangma.
“Nga pynbna hangne ba hadien ba la ïoh jingmynjur na u National President ka seng, u Conrad K. Sangma, nga sngewbha ban pyntip ba na bynta ka Shillong Parliamentary konstitwensi, la mynjur ïa ka kyrteng jong ka Dr. M. Ampareen Lyngdoh katba ïa ka Tura Parliamentary konstitwensi, la mynjur ïa ka kyrteng ka Agatha K. Sangma, kaba long ruh ka MP ba mynta na katei ka konstitwensi,” ong u State-President ka NPP, Bah Prestone Tynsong haba kren sha ki lad pathai khubor.
U la ïathuh ruh ba ha shuwa, ka State Election Committee (SEC) ka la khmih bniah bin-pa-bin ha ryngkat ka jingïamir jingmut ym tang ha ki kyrdan jong ki distrik hynrei ha ki ‘Polling Booth’ bad kumta la rai ban ai jingmut ïa kitei ki 2 tylli ki kyrteng sha ki bor ba halor jong ka seng, ha kajuh ka por la mynjur ruh ïa ki – Dr. M. Ampareen Lyngdoh bad ka Agatha K. Sangma.
Haba kylli halor ka ilekshon ba dang shu dep sha ka ïingdorbar thawaiñ haba phai sha Ri-lum Khasi-Jaiñtia, bad kumno ka seng kan pynkhreh ïa ka ilekshon Lok Sabha, u Bah Tynsong u la ong, “Ngi la don lypa ïa ka rukom treikam bad ngan shu pynkynmaw ba haba phai sha ka jingïoh ‘vote’ ha ka ilekshon 2023 (Shillong Parliamentary), phin ïohi ba ka NPP ka dang tam hi ha ka jingïoh ‘vote’, bud sa ka UDP, wan sa ka Congress…kumta ngi dang long hi kiba hakhmat.”
Haba pynsngew ba ka seng kan trei shitom met bad mynsiem, u President u la ong ba u la dep bthah ïa baroh ki nongkitkam bathymmai ban hiar shaduh ki shnong ki thaw khnang ba ka seng kan ïoh kheit ïa u soh ka jingjop.
Haba kylli la ka seng kan pan jingkyrshan ne em na ki seng ba ïatehlok ha ka Sorkar MDA, u la ong, “Lada ki long kiba la khreh…peit na bynta ka ilekshon, kum ka seng ngi kwah kyrpad ïa baroh ban kyrshan ïa ki kyrtong jong ngi. Mynta lei ba ngi la pynbna sa ïa ki kyrteng jong ki kyrtong, nga kwah ban kyrpad la ka long ka UDP, BJP, KHNAM ne mano-mano ba lada ki lah, balei kim kyrshan ïa ki kyrtong jong ka NPP.”
Shuh shuh haba jubab, u Bah Tynsong u la bynrap, “Namar ha ka ilekshon kam mut ba yn pynïeng da u shynrang ne kynthei…na bynta jong ngi, kaba hakhmat eh ka long ka jingdon jingkyrmen ban jop bad kumta ngi donkam ban ïoh ki kyrtong kiba paka tam bad halor kane, ngi la jied ïa kine ki 2 ngut.”
Ka NPP kan sa pynmih ruh ïa ki mat treikam halor ki jingthmu ka seng na bynta ka ilekshon sha ka Lok Sabha.
