Shillong, Naiwieng 24
Hadien ba u Lat ka Jylla u la dep ban mynjur ïa ka Delimitation Committee na ka bynta ban pynbeit biang ïa ki konstitwensi ha Khasi Hills Autonomous District Council (KHADC) bad Jaiñtia Hills Autonomous District Council (JHADC), u Symbud Myntri Rangbah uba peit ïa ka tnat District Council Affairs, u Bah Prestone Tynsong u la ong ba la khmih lynti ba ki Delimitation Committee jong ar tylli ki Autonomous District Council kin pyndep kloi katba lah khnang ban ïoh pynlong ïa ka ilekshon.
Na ka jingbatai u Bah Prestone, la sngewthuh ba jingpynbna ïa ka ilekshon sha ka Ïingdorbar KHADC bad JHADC kan sa wan tang ynda la dep ban pynbeit thymmai ïa ki konstitwensi ha baroh ar tylli ki Council.
U Bah Prestone u la ong ba na ka liang ki ar tylli ki Council ki la phah ka jingtyrwa ban pynbeit thymmai ïa ki konstitwensi namar ki don ki konstitwensi ha ka ilekshon MDC khamtam jong ka KHADC kiba kham heh bad kham bun ki nongthep vote ban ïa ka jingdon ki nongthep vote ha ki konstitwensi ha ka ilekshon MLA.
Kumta u la ong ba la khmih lynti ba ki Delimitation Committee jong baroh ar tylli ki Council kin pyndep kloi katba lah ïa ki kam kiba ïadei bad ka jingpynbeit ïa ki konstitwensi.
Katkum ka samoi treikam kaba san snem, ki ar tylli ki District Council, ka KHADC bad JHADC ki dei ban kut noh ha u Rymphang, 2024. Lada kam don ka jingpynjlan ïa ka samoi treikam, la hap ban pynlong noh ïa ka ilekshon ha u Rymphang, 2024.
Hynrei lada don ka jingkylla ha kine ki khyndiat bnai, khamtam namarba dang ïaid ka jingpynkhreh ban pynbeit thymmai ïa ki konstitwensi, lah ban buhteng noh shwa ïa ka ilekshon.
