Shillong, Naiwieng 24
U ksiang ka Hynñiewtrep National Liberation Council (HNLC), Bah Sadon Blah, u la ïathuh ba ki nongïalam HNLC ha Bangladesh kin hap ban shong pyrkhat para nongïalam halor ka jingtyrwa ka sorkar jylla ban wan ïakren ïasuk shabar jylla.
U Bah Sadon u la ïathuh ba ki kyndon aiñ kiba pynngat ïa ki nongïalam HNLC kiba kham hakhmat ki dei ïa u Chairman bad Secretary.
U la ong namar ka aiñ ka dei kajuh ha India, kam don jingshngaiñ ïa ki nongïalam HNLC ban ïakren shabar ka jylla lada ym pat weng.
Nalor nangta, u Bah Sadon u la ong ba kane ka jingtyrwa ka sorkar jylla ban ïakren ïasuk bad ki nongïalam ka HNLC shabar ka jylla kam dei kaba mih na jingkren u Bah Prestone Tynsong uba dei u Symbud Myntri Rangbah ka jylla bad uba bat ïa ka tnat Pohïing, hynrei kane ka jingïakren ka la kham slem haba u ïakren bad ki ophisar ka sorkar jylla.
Namar kata, u don jingkyrmen ba ki nongïalam ka HNLC ha Bangladesh kin sa shim ïa ka rai kaba bha tam jong ki haba ki la shong pyrkhat para nongïalam.
