Shillong, Naiwieng 24
Ïa ka met ba sah jong u MLA barim ka Mawlai konstitwensi, u Bah Standling D. Khongwir la tep donburom noh ha ka Sngi Thohdieng ha u Lum Jingtep ka Balang Presbyterian, Mawlai Nonglum.
Ha shuwa ban rah ïa ka met sha lum, la pynlong shuwa da ka jingïalang ba lyngkot ha Madan jong ka ïingdorbar shnong, Mawlai Nonglum ha ka jingïadon lang u MLA ka Mawlai, Bah Brightstarwell Marbaniang, MDC, Bah Teibor Pathaw, ki nongmihkhmat na kiwei-kiwei ki konstiwensi ba kynthup ïa u Bah Adelbert Nongrum, Myntri Sorkar, Bah Paul Lyngdoh, ki dkhot ka Mawlai Town Dorbar lem bad kiwei-kiwei ki nongwan sngewlem.
U Bah Khongwir u la khlad noh ha ka step jong ka 21 tarik Naiwieng ha NEIGRIHMS, Mawdiangdiang, Shillong.
Kumban shu pynkynmaw, u Bah Khongwir u la long u Symbud Myntri Rangbah barim ka Jylla bad MLA barim ka Mawlai konstitwensi haduh 25 snem kynthih.
Nalor kane, u la shakri ruh kum u Rangbah Shnong ka Mawlai Nonglum haduh 55 snem bad long teng kum u President ka Mawlai Town Dorbar.
Ha ki snem kiba mynshwa, u la long ruh uwei na ki ‘rang ïalehkai kynjatbol uba pawkhmat bha. U Myntri Rangbah ka Jylla, u Conrad K. Sangma u la leit sngewlem sha ïingsah u Bah Khongwir ha ka Sngi Ba-ar bad pynpaw ka jingsngewsih halor ka jingkhlad noh utei u rangbah, naba u dei u briew uba la noh synñiang shi kat dei ki kam sha ka Mawlai konstitwensi bad sha ka Jylla hi baroh kawei.
