Shillong, Naiwieng 24
Wat la ka jingai jingkheiñ kaba shu antad da ki Deputy Commi-ssioner ha ki snem ba la leit ka pyni ba u dewïong ba la dep tih ha Meghalaya u don 32 lak Metric Ton (MT) haduh 2019, hynrei ka jing-kheiñ kaba tikna katkum ka ‘drone survey’ ka pyni ba u dewïong ba la dep tih u don T.14.1 lak MT haduh u snem 2022.
Hynrei kham ha shwa ban leh ïa ka ‘drone survey’ la don ruh u dewïong ba ïoh kurup ha surok namar ka jingshalan beaiñ kumjuh ruh na ki jaka pynlang dewïong, naduh u snem 2015 haduh 2022.
La ong ba hadien ba ka NGT ka la khang ïa u dewïong naduh u snem 2014, la ai jingkheiñ da kaba leit peit sha ki jaka pynlang dewïong da ki Deputy Commissioner ha u snem 2019 ba u dewïong ba la dep tih u don kumba 32 lak MT.
Kumta khnang ban ïoh jingkheiñ kaba tikna bha, la leh da ka ‘drone survey’ ha kaba la pyni ïa ka jingkheiñ ba u don u dewïong 14.1 lak MT.
Shwa ban leh ïa ka drone survey ïa u dewïong, ka Sorkar Jylla ka la ïoh kurup lypa ïa u dewïong kumba 4.72 lak MT.
Ka tyllong khubor ka ïathuh ba ha shwa ka drone survey, la dep lilam ruh kumba 1.5 lak MT u dewïong ha u snem 2021-2022.
Nangta hadien ka drone survey, kumba 3.8 lak MT la lilam ha u Lber, 2023 bad sa kumba 5.9 lak MT la buh shuh ïa u dewïong na ka bynta ban lilam ha u Naiwieng 2023.
Na ka liang ka committee kaba la thaw da ka Meghalaya High Court ruh ka la shim beit da ka jingkheiñ kaba la ai katkum ka drone survey namar ka kham biang bad kham tikna.
Kumta, u dewïong ba dang sah ban lilam ha shwa ban kut u snem 2023 u don sa kumba 4.4 lak MT.
Namar kata, ka Sorkar ka la pyni ba ka jingkheiñ ïa u dewïong ba la dep tih kam jah namarba la leh da ka drone survey kaba kham tikna haba shim ïa ka jingïapher hapdeng kaba shu leit peit da ka khmat bad kaba leh da ka drone survey kan don beit kumba 30% ka jingïapher.
