Shillong, Naiwieng 24
U Myntri Khynnah ka tnad Micro, Small & Medium Enterprise, u Bhanu Pratap Singh Verma u la ong ba nalor ka skhim PMEGP, ka Sorkar hapoh ka jingïalam u Myntri Rangbahduh ka ri, u Narendra Modi u la wanrah sa ïa kawei pat ka skhim bathymmai kaba tip kum ka PM Vishwakarma ha ka jingkren jong u ha ka prokram Hamara Sankalp Vikasit Bharat (HSVB) kaba la pynlong da ka shlem treikam BDO, Mawryngkneng C & RD Block, East Khasi Hills District ha ka shnong Tynring da ka jingïatreilang bad ka shlem treikam ka Deputy Commissioner, East Khasi Hills District bad ki tnad Sorkar bapher-bapher.
Haba kren ha kane ka sngi, u Bhanu Partap Singh Verma u la ong ba kane ka skhim ka ai jingkyrshan ïa kiba trei ïa ki kam tynrai bad kiba shna ïa ki tiar ne trei da la ki kti ha nongkyndong ne ha sor jong ka ri India, kaba dei ka skhim hapoh ka tnad jong ka MSME.
U la ong ruh ba kan don kumba 18 tylli ki jait kam tynrai ki ban kynthup ha kane bad lyngba kane ka skhim kan don ruh ka jingïarap ha ka rukom ka ‘grant’ kaba T.15,000 na ka bynta ban thied ïa ki tiar ban pyndonkam ban trei bad nalor kata kin ïoh ruh ïa ka ‘stipend’ kaba long T.500 shi sngi ha ka por shah hikai.
Haba pynpaw ïa ki kam kiba ka Sorkar Pdeng ka la wanrah na ka bynta ka bha ka miat ki paidbah kum ka skim PM-Ujjwala kaba aiei ïa ka ‘Gas Connection’ sha ki longïing baduk, u la khot la wer ïa ki paidbah ban shim ïa kum kine ki lad jingïarap na ka Sorkar na ka bynta jong ki.
U Myntri ka tnad ka ri jingri bad dohkha ka Sorkar Jylla, u Bah A.L. Hek, haba kren ha kane ka sngi u la ong ba ka Sorkar Pdeng hapoh ka jingïalam u Narendra Modi ka la wanrah shibun ki jingmyntoi na bynta ki paidbah khlem da peit shiliang khmat la ki dei ha kano-kano ka niam ne jaidbynriew.
U la ong ruh ba ka Sorkar Jylla hapoh ka jingïalam u Myntri Rangbah, u Conrad Sangma dang shen ki la wanrah ïa ka skim ‘CM-Elevate’ na bynta ban plie lad ïa kito kiba thmu ban seng ki kam ki jam lajong da kaba shim ki lad jingïarap lyngba na kane ka skhim.
La sakhi ruh ha kane ka sngi da ka jingdonlang u MLA ka Mawryngkneng, u Bah Heavingstone Kharpran. Kham ha shuwa jong kane ka jingïalang, ka DC, East Khasi Hill District, Kong, R.M. Kurbah, IAS ka la ïalam ban shim ïa ka jingkular ne ka ‘Panch Pran Pledge’ ha ka ban pynlong ïa ka ri India kaba kiew kaba roi bad ban ïeng ha la ki kjat shuwa ka 2047.
Ha kane ka sngi ka la don ruh ka jingpynrung kyrteng ha ka ‘Aadhaar’, MHIS bad ka ‘Health Check-up’.
