Gaza, Naiwieng 24 (UNI)
Ka International Committee of the Red Cross (ICRC) ha ka Sngi Thohdieng ka la pynthikna ba ka kynhun Hamas ka la pyllait noh ïa 24 ngut ki ‘riew paidbah kiba ka la rahbor sha Gaza Strip.
“Ngi sngewkmen ban pynthikna ba 24 ngut ki briew kiba la shah rahbor ki la lait. Ngi la don bynta ban kit ïa kine ki 24 ngut na Gaza sha khappud ha Rafah,” la ong ka ICRC ha rynsan X.
Ka jingpyllait ïa kine ki 24 ngut ka long hadien ba ka Israel bad ka Hamas ki la poi sha ka jingïasngewthuh jingmut ban pynsangeh shwa shipor ïa ka thma. Kane ka urlong hadien bun taïew jong ka jingïakren hapdeng ka Israel, Hamas, Qatar, Egypt bad ka United States.
Na ka liang ka Israel kan sa pyllait noh na patok ïa ki katto katne ki nong Palestine kiba ka la set ba kynthup ïa ki kynthei bad khynnah.
Ka sorkar Qatar ka la pynthikna ba ka Hamas ka la pyllait ïa kitei ki 24 ngut ki briew kiba la shah rahbor katba ka Israel ka la pyllait ïa 39 ngut ki kynthei bad khynnah na ki patok jong ka.
Napdeng ki 24 ngut kiba la shah pyllait ki kynthup ïa 13 ngut ki nongshong shnong ka Israel, 10 ngut na Thailand bad uwei na Phillippines, la ïathuh u nongaiktien ka tnat bar ri jong ka sorkar Qatar, u Majed Al Ansari.
Ka jingïakut ka long ba ka Hamas kan pyllait ïa 50 ngut napdeng ki 190 ngut eiei ki briew kiba ka la rahbor na Israel sha Gaza ha ka 7 tarik Risaw kaba long ruh ka sngi ba ka thma hapdeng ka Israel bad Hamas ka la khie.
Na ka jingthombor ka Hamas ha ka 7 tarik Risaw, kumba 1,200 ngut ki nong Israel ki la shah pynïap katba 240 ngut eiei ki nong Israel bad ki nongshong shnong na kiwei pat ki Ri ki la shah rahbor sha Gaza.
