Shillong, Naiwieng 24
Ka Meghalaya ASHA Worker’s Union (MAWU) ka la shim ïa ka rai ban weng noh ïa ka jingïakhih ha ka 24 tarik u bnai Naiwieng 2023 hadien ka jingsangeh treikam kaba khlem buh por kaba la kot sha ka lai taïew tam.
Kum ban shu kdew ki nongtrei ASHA ki la shim da ka rai ban ïakhih bad sangeh treikam khlem buh por hadien ba ka sorkar ka khlem sngap satia ïa ki mat jingdawa jong ka Union kaba long ban pynkiew ïa ka jingsiew na ka T. 2000 sha ka T. 5000 shibnai.
Na ka liang ka Myntri ka tnat ka Koit ka Khiah, ka Dr Mazel Ampareen Lyngdoh ha ka 22 tarik u bnai Naiwieng 2023 ka la pyntip ba ka sorkar ka la rai ban pynkiew shuh ka jingïoh jong ki nongtrei ASHA sa T.1000 ka ban long T.3000 ha ka shibnai lyngba ka skhim. Ïa kane yn sa pyntreikam ynda la dep ban pynlong ïa ki jingïamir jingmut bad ki Rangbah Shnong ha ryngkat ki Village Health Council (VHC) ha ki distrik bapher bapher.
Ka President jong ka MAWU, ka Kong Mirajune Myrsing ka la ong ba ha katei ka jingïalang jong ka Union ki la shim ïa ka rai ban sangeh noh ka jingïakhih bad ban leit phai biang sha la ka kam.
Katei ka President ka la ong ba na ka liang ka kynhun kam pat shim ïa ka rai lada kan pdiang ne em ïa ka rai ba ka sorkar ka la shim ban pynkiew T. 1000 ïa ka jingïoh jong ki ASHA hynrei kan sa ai ïa ka jubab tat haduh ba ka sorkar kan pyndep ban ïamir jingmut halor kane.
“Na ka bynta kane ka T.1000 kaba na ka liang jong ka tnad ka la tyrwa, haduh mynta ngim pat ong ba ngi pdiang lane ngin nym pdiang namar kumba ka Myntri ka la ong ban ai por ïa ka kumba lai bnai ba kan pyndep ïa ka jingïamir jingmut, kumta na ka liang ka jong ngi ruh ngin ap tat haduh ba kan da pyndep ïa ki jingïamir jingmut bad kaei ka jubab ba ka ïoh na kitei ki jingïamir jingmut”, la ong ka Kong Myrsing.
Ka Kong Myrsing ka la ong ba ka Union ka la rai ban sangeh noh ïa ka jingïakhih kaba dei ban long ha ka 27 tarik mynta u Naiwieng hynrei kin nym sangeh satia ban ïaleh namar ba ki dang hap ban ap ïa kata ka jingïamir jingmut jong ka Myntri bad ki Rangbah Shnong bad ki VHC ha ki distrik bapher bapher.
