Shillong, Naiwieng 24
U Chief Executive Member (CEM) ka Khasi Hills Autonomous Dis-trict Council (KHADC), Bah Pynïaid Sing Syiem ha ka Sngi Thohdieng u la pynpaw ka jingsngew-khia halor ka jingkren u Chairman ka Art & Culture Committee ka Seiñ Raij Jowai, u Bah Chandlok Dkhar.
U Bah Dkhar haba ai jingkren ha ka jingrakhe ïa ka ‘Seng Kut Snem’ ha Madan Weiking, Jaïaw, ha ka Sngi Palei u la kynthoh da kaba tyngeh ba lada ki District Council kim lah ban ïada ïa ki riti-dustur, la dei ban pynduh noh ïa ki.
“Ngi hapoh ka Jylla, ngi don lai tylli ki District Council, u thew ïa kano…ngi, ngim tip namar ban shu kyllum lang beit bad ban ong ba ki District Council kim treikam, ka long kaei-kaei kaba bakla bad kaba ngim lah ban pdiang,” ong u Bah Syiem.
Ha kajuh ka por, u la pan jingpynshai na u Bah Dkhar halor ka nongrim ka jingkren jong u bad ban pyntikna ba kino kita ki District Council kiba pynduh riti-dustur bad kino ki bym bit bym biang.
“Lada ym don lei ka District Council, shaei yn poi ki nongsynshar…ki Syiem, ki Doloi, ki nongsynshar Raid, ki Sordar, ki Rangbah Shnong,” u la ong.
U CEM u la pynsngew ruh ba ka Hima Khyrim, Hima Mylliem kiba dang bat ïa ka niam ka rukom, kin jin da la duh noh 70 snem mynshuwa lymda don ka District Council naba ym shym la ïoh ïa ka aiñ jingïada kaba kyrpang na ka Riti Synshar ka Ri.
“Te phin ong ba ngin pynduh noh ïa ka District Council. Pyrkhat shispah sien shuwa ba phin kren,” u la ong.
Halor ka jingkynnoh bamsap ïa ki MDC, u Bah Syiem u la ong ba ym tip shai ïano utei u rangbah (Dkhar) u kren bad kumta kane ka long ka bym lah pdiang namar ka pynhiar kyrdan ïa MDC bad ka long ka bym sngewtynnad.
“Nga la kren ïa ki nongïalam jong ka Seng Khasi, Sengkmie ba ka jingkren jong une u rangbah ka long ka bym sngewtynnad bad dei ban leh eiei. Ka Sengkmie ka la shimkhia halor kane bad pynpaw ka jingsngewsih kaba khraw ba ka jia kumne bad la ai jingmut ruh ba nangne shakhmat lada ai jingkren ïano-ïano dei ban da khmih bniah kumno kin kren namar ka ktah ïa baroh,” u la ong.
Na ka liang u CEM u la bynrap ba u Secretary ka EC u la pan jingpynshai na utei u rangbah halor katei ka bynta namar ka jingkren jong u kam ktah tang ïa u (CEM) shimet hynrei ïa baroh ki MDC kiba la shah jied ha u paidbah, ka Khyrnit ba 6 bad ka ophis treikam kumjuh.
