Shillong, Naiwieng 26
Ka jingkurup ïa u dewïong ba shalan beaiñ lyngba ki surokbah ha kylleng ki district ka Jylla naduh ba la pyntreikam ïa ka hukum ka National Green Tribunal (NGT) ka bun eh ha East Jaiñtia Hills district kata, naduh u snem 2015 haduh 2022.
La ong ba ha u snem 2022, ka jingkurup ïa u dewïong ka dei hashwa ban leh ïa ka drone survey.
Katkum ka jingbuh jingkheiñ ka Sorkar ïa u dewïong ba ïoh kurup ha kylleng ki district naduh 2015 haduh 2022 ka pyni ba tang ha East Jaiñtia Hills district, la ïoh ban kurup 1,60,449.48 MT u dewïong, nangta bud sa ka West Jaiñtia Hills district 1,34,613.88 MT. Ha West Khasi Hills District, la ïoh kurup 1,20,949.78 MT u dewïong bad ha East Garo Hills District la ïoh kurup 34,629.75 MT.
Ha Ri-Bhoi district kaba ym don dewïong, hynrei la ïoh kurup na ki trok kiba kit dewïong ban shalan bad ïoh kurup haduh 9,454 MT naduh 2015 haduh 2022. Kumjuh ruh ha East Khasi Hills district kaba ym don ka jingpynmih dewïong, hynrei ka jingkurup dewïong na ki trok kiba ïaid lyngba ka District ka long 3,876.4 MT.
Ka jingkurup dewïong ha kiwei pat ki district kum ha South Garo Hills ka long 6,755.9 MT, ha North Garo Hills 632 MT, ha West Garo Hills 224.15 MT, ha South West Khasi Hills 192 MT, bad ha Eastern West Khasi Hills 72 MT.
La ong ba ka jingkurup dewïong ka la kham duna hadien ba la ïaid ka jinglilam ïa u dewïong ba la dep tih da ka Coal India Limited.
