Shillong, Naiwieng 26
Ka Sorkar Jylla mynta ka la khylliap noh ïa ka jingthmu ban tei kad liengsuiñ da kaba thymmai hynrei kan kham pynbha ïa ka kad liengsuiñ kaba la don lypa ha Umroi da kaba shna pynjrong ïa ka jaka hiar bad kiew ki liengsuiñ (rung way) da kaba ot ruh ïa ki lum kiba long mawjynthut baroh shikatta.
Ka tyllong khubor ka ïathuh ba ka Sorkar Jylla ka la pyrkhat thymmai da kaba shna kham pynheh ïa ka kad liengsuiñ ha Umroi namar lada shna da kaba thymmai ka don ka jinglut kaba kham heh.
“Kumta ngi dang ap ban ïoh ka kaiphod na ka Airport Authority of India (AAI) bad na kawei ka kompani halor ka jingpynbha ïa ka kad liengsuiñ bad katno ka jingpynlut,” la ïathuh ka tyllong khubor.
Kham mynshwa, ka technical committee jong ka AAI ka la pyni ïa ka jinglut kaba ym duna ïa ka T.7000 klur ban pynbit pynbiang ïa ka kad liengsuiñ ha Umroi kynthup ruh ïa ka jingot ïa ki katto katne tylli ki lum kiba wit ha ka por ba kiew bad hiar ki liengsuiñ kiba heh.
“Ngi khmih lynti ba ki kaiphod ki ban sa phah sha ka Sorkar kin pyni ïa ka jingdonkam pisa ban pynlut kaba kham duna ban ïa kaba ai jingkheiñ kham mynshwa,” la bynrap ka tyllong khubor.
Kumta ka Sorkar Jylla ka la iehnoh ïa ka jingthmu ban tei ïa ka kad liengsuiñ da kaba thymmai shawei pat namarba heh palat ka jingpynlut.
Kumta kaba kham suk tam ka long ban peit ba la kumno kumno ka kad liengsuiñ kaba la don kan long kaba kham biang da kaba shna pynjrong ïa ka jaka hiar bad jaka kiew liengsuiñ (runway) bad pynbit pynbiang ïa ki tiar ki tar kiba lah ban ïarap ban hiar ki liengsuiñ kiba kham heh.
Ka jaka hiar bad jaka kiew liengsuiñ ha kad liengsuiñ ha Umroi ka don ïa ka jingkongsan kaba long kumba 6000 phut mynta, bad donkam ban pynjrong shuh shuh sha ka 8000 phut ban lah ki liengsuiñ kiba heh ban hiar bad ban kiew.
