Shillong, Naiwieng 26
Ka Khun Hynñiewtrep National Awakening Movement (KHNAM) ka la pynpaw ka jingpyrshah jur halor ka jingrung ki shipai kiba la shongthait (ex-servicemen) ha-poh ka Zilla Sainik Welfare jong ka Jylla kiba dei na Manipur.
Ka KHNAM ka la phah da ka jingthoh dang shen sha u Secretary ka tnat General Administration Department (GAD) ka Sorkar Jylla, u Bah Cyril VD Diengdoh lyngba u General Secretary ka KHNAM u Bah James M.A. Neng.
La ong ba ka tnat Zilla Welfare, kaba dei ka subordinate office hapoh ka tnat GAD ka Sorkar Jylla, ka la pynrung kyr-teng lang wat ïa ki shipai kiba la shongthait kiba dei na Manipur.
Ka KHNAM ka la pynpaw ba ka long kaba sngewsih jur ba ka jingumsnam ka jia ha Manipur kaba pynthut ïa ka suk ka saiñ hapoh ka thaiñ hynrei tang namarba don ka jingumsnam ki la don bun ki shipai ba la shongthait kiba dei na Manipur kiba pynrung kyrteng hapoh ka Meghalaya Zilla Sainik Department.
U Bah James u la ong ba ki shipai ba la shongthait kiba dei na Manipur ki dei ban pynrung kyrteng ha ka Jylla lajong khnang ba kin lah ban ïoh ki jingmyntoi kumba dei ban ïoh na ka por sha ka por hapoh ka Jylla lajong.
Ka Kendra Sainik Board ka plielad ban thaw ïa ka Department of Sainik Welfare ha man la ki Jylla bad Union Territory ban peit bad khmih na ka bynta ka bha ka miat ki shipai ba la shongthait.
U Bah James u la ong ba ka daw ba kongsan ba ka KHNAM ka pyrshah ban pynrung ha Meghalaya ïa ki shipai kiba la shongthait kiba na Manipur ka dei namarba ki la don lypa shibun ki shipai kiba la shongthait kiba na Meghalaya kiba shaniah ha ka Zilla Welfare Department na ka bynta ki jingmyntoi naduh ka jingai kam ne kiwei pat ki jingmyntoi kiba ki ju ïoh na ka por sha ka por.
“Lada ki shipai kiba la shongthait kiba dei na kiwei ki Jylla ki wan ban pynrung kyrteng hangne, ki bhah jingmyntoi kiba dei ban ïoh da ki shipai kiba dei na ka Jylla kiba la shongthait, kin kham duna noh,” la ong u Bah James.
Ka KHNAM ka la ong ba la ïoh jingtip ba ka Zilla Welfare Department ka kham buh hakhmat ïa ka bha ka miat ki shipai ba la shongthait na kiwei ki Jylla, bad kane ka long pynban ka jingpynduh jingmyntoi ïa kiba dei na kane ka Jylla.
Ka KHNAM ka la ong ruh ba tang namarba u Zilla Sainik Welfare ophisar u dei na Manipur, kam dei satia ban long ka daw ban pynduh lad ïa ki shipai kiba la shongthait kiba dei na kane ka Jylla bad dei ban peit ban khmih katkum ki kyndon bad jingthmu ka Kendra Sainik Board.
