Shillong, Naiwieng 26
Wat la ki doktor ki la dep leh ‘post mortem’ ïa ka met jong ka samla Phibankyntiew Sun ha Civil Hospital Shillong hadien ba la lap ïa ka metïap na kshaid Weitdem kaba don hajan ka shnong Traw, East Khasi Hills District hynrei haduh mynta ki bahaïing hasem kim pat ïoh ïa ka kaiphod.
Haba pyrshang ban ïakren bad u Rangbah Kur Sun u Bah E.L Sun, u la ïathuh ba ki bahaïing ki la leit wad jingtip na ki pulit hynrei kim pat ai ïa ka kaiphod.
U la ïathuh ba ki doktor hadien ba ki la pyndep ‘post mortem’ ïa ka metïap jong ka samla Phibankyntiew Sun ki la aiti ïa ka kaiphod sha ki pulit, hynrei ki pulit haduh mynta kim pat pyntip sha ki bahaïing.
U la ïathuh biang na ka liang ki bahaïing hasem kin dang leit ban buddien haduh ban da ïoh ïa ka kaiphod.
Kum ban shu pynkynmaw, ka Phibankyntiew Sun, 18 snem ka rta na Mawngap ka la jah na la ïing bad u Wanboklang Kurbah, 20 snem ka rta na Traw naduh ka 20 tarik Nailur, 2023. Kumta ha ka 3 tarik Risaw, 2023 la lap shwa nyngkong ïa ka metïap jong ka Phibankyntiew Sun na ka kshaid Weitdem bad ha ka sngi kaba bud kata ha ka 4 tarik Risaw la lap sa ïa ka metïap jong u Wanboklang Kurbah.
Ïa ka Phibankyntiew Sun la pyndep ban leh ‘post mortem’ ha ka 4 tarik Risaw, 2023 ha Civil Hospital Shillong bad ïa u Wanboklang Kurbah la pyndep ha NEIGRIHMS Shillong.
