Shillong, Naiwieng 26
Ka sorkar Meghalaya ka la pynbna ïa ka ‘Meghalaya Street Vendors (Protection of Livelihood and Regulation of Street Vending) Scheme, 2023’ ha ka 25 tarik Risaw, 2023, bad ïa kine ki kyndon la shna katkum ka “Street Vendors (Protection of Livelihood and Regulation of Street Vending) Act, 2014”.
Kane ka skhim ka long ban ïada ïa kito kiba shong die jingdie ha madan bad ban pynïaid ryntih ïa ka rukom die. Hapoh kitei ki kyndon, la mang ruh ban pyntreikam ïa ka jingai jaka ban shong die jingdie kaba long ha ka lynti kaba shai bad kaba khuid khlem da leh shiliang ïano-ïano. Ha kajuh ka por, ki don ruh ki kyndon kiba batai shaphang ka jingdonkam ban lehkhuid, ban lait na ki jingma jingmynsaw bad ban ym ktah ïa ki nongleit nongwan.
Katei ka skhim ka batai ruh ba ïa ka sorjamin ban lap ïa ki briew kiba die jingdie ha madan yn leh da ki Town Vending Committee (TVC) katkum ki jaka kiba ki dei khmih. Ïa ki jingtip na ka sorjamin yn lum ha ka rukom kaba dei da ka jingïarap ki kor ‘Digital’. Ïa ka sorjamin yn leh ha ki bynta bapher-bapher bad ka bynta kaba nyngkong kan long hapdeng 4 haduh 16 tarik Nohprah, 2023 ha Khyndailad, Jail-Road, Barik, Malki-Dhankheti, Laitumkhrah bad Polo.
Ki nongdie jingdie ha madan kiba lah ban pynrung kyrteng kin hap ban pyni ïa ki kot ki sla ban pynithuh ïalade, ki kot ban pyni ba ki la shong la sah ha Meghalaya ym duna ïa ka lai snem, bad ki jingpynshisha ba ki la don ha ka kam die jingdie ha madan ha kajuh ka jaka ym duna ïa ka hynriew bnai naduh ka sngi ba la pynmih ïa ka byrta halor ka sorjamin.
Ka jingpynrung kyrteng ïa ki nongdie jingdie ha madan kan treikam na ka bynta san snem. Hadien ka jingpynrung kyrteng bad lada don ka jaka ban shong die jingdie, ka TVC kan sa ai ïa ka syrnod kaba la tip kum ka “Certificate of Vending (CoV)”. Yn ai ruh ïa ka kot jingpynithuh (ID Card) sha kito kiba la pynrung kyrteng bad kane kan treikam na ka bynta shi snem. Dei tang kane ka syrnod CoV kaba pynthikna ba kito kiba die jingdie ki lah ban shong ha kato ka jaka ba la mang.
Ha kajuh ka por, ka sorkar jylla bad ki TVC ki dang pynkhreh ïa ka Street Vending Plan ka ban mang ïa ki jaka ban shong ki nongdie jingdie ha madan ha baroh kawei ka sor bad kiwei pat ki jaka.
