Shillong Naiwieng 26
Ki jaka ha New Shillong Township (NST) ki la nang sakhi ïa ka jingpynïasoh bad jingshna pynheh ïa ki surok kiba kham kylluid ha kine ki khyndiat snem khamtam kum ka jingpynkhreh ïa ka jingpynkynriah ïa ki shlem treikam jong ka Sorkar Jylla.
Napdeng ki katto-katne tylli ki surok kiba don sha katai ka thaiñ, kawei ka dei ka surok kaba heh kaba dang shna na Ummir ha thaiñ Mawpdang ban poi sha Mawkhanu ha Shillong Byepass.
Kane ka surok kan nym ïaid lyngba shuh na ka shnong Diengpasoh, hynrei kan ïaid beit-beit sha Mawkhanu hajan ba don ka Toll Gate ha Shillong Byepass.
Ka jingshna ïa kane ka surok ka la ïaid shakhmat ha kaba la tih pynheh ban kham kylluid ki kali kiba ïaid hapdeng kiba leit bad kiba wan.
Ka thong ban pyndep ïa kane ka surok ka long hashwa ban poi ka aïom slap ha u snem 2024.
Kum ban shu kdew hangne, ka Sorkar ka la dep shim jaka shuh shuh sa 807 akar na ka bynta ban pynkynriah ïa ki shlem treikam jong ka na nongbah Shillong sha thaiñ Mawpdang bad Mawkhanu ha kine ki snem ban sa wan.
Kane ka dei ruh ka jingthmu ban pynduna ïa ka jingkhapngiah ha kaba ka nongbah Shillong ka la mad jingeh bha katba nang mih ki sngi ki snem.
