Khliehriat, Naiwieng 26
Ka Khasi Students’ Union (KSU) East Jaiñtia Hills District Unit hapoh ka jingïalam u President u Streamly S Suchen, u Assistant General Secretary u Pynshai Kupar Dkhar bad kiwei ha ka 24 tarik mynta u bnai ki la leit ban ïakynduh ïa u EE ka Tnat MePDCL ha Moowakhu ban pan jingpynshai halor ka jingkiew jong ka bai ding ilektrik ha ki shnong bad ki thaiñ jong ka East Jaiñtia Hills District.
Na ka liang jong u EE u la pynpaw ba ka jingkiew jong ka bai ding ilektrik ka don bun ki bynta. Kawei na kine ka dei na ka daw ba ka shlem treikam ka ju pynbeit thymmai lane ka ju pynkiew man la u snem ïa ka dor ki bill, kata naduh ki domestic, commercial bad ki high voltage tension.
Ka ba-ar u la ong ba ka dei ka jingbym don ki ‘meter reading’ jong ki longïing kaba la pynlong ïa ka shlem treikam jong ka MePDCL ban sam ïa ki bill da kaba shu kheiñ antad kaba mih ka jingduhnong ïa kiba khlem pyndonkam heater, refrigerator bad kiwei de ki tiar ilektrik namar ka bai ding ilektrik ka kham kiew, katba ki longïing ba pyndonkam ïa ka heater, refrigerator bad ki tiar bording bapher-bapher ka bai ding ilektrik ka la kham shong tad.
Na ka liang ka seng ka la pynpaw ïa ka jingbym sngewhun ïa kane ka jingaidaw jong u EE ka MePDCL da kaba ong ba ka lah ban don kaei-re-kaei kaba buhrieh sha lyndet. Nalor nangta ka seng ka la ong ba kan ïai buddien ba balei kane ka jingkiew ka bai ding ilektrik ka kiew sted khlem don kano-kano ka jingpyntip kaba bniah ne official notifications na ka shlem treikam sha ki longïing jong ki shnong bapher bapher hapoh u pud u sam ka East Jaiñtia Hills District.
Halor kane ka bynta ka seng ka la ong ba kan sa pynlong ïa ki jingpynshai paidbah ha ryngkat ka jingïatreilang bad ki nongtrei ka MePDCL Khliehriat Distribution Division ha ki shnong ki thaw katba lah lyngba ki shnat treikam ka seng kiba don hapoh East Jaiñtia khnang ba ki paidbah kin shai shuh shuh bad ba kin lah ban sngewthuh kham bha halor kane ka mat.
