Shillong, Naiwieng 26
Ki pulit ka jylla ha ka Sngi Saitjaiñ ki la ïoh kem ïa 14 ngut ki briew kynthup ïa uwei uba dang hapoh 18 snem ka rta na Ri-Bhoi halor ka jingkynnoh ba ki la donkti ban tuh umphniang hashwa ban khleh bad die pat ha ka dor kaba tad sha kiwei.
Ka jingkem ïa kitei ki briew ka long hadien ka jingïoh jingtip halor ka jingjur ki kam tuh umphniang ba la pynkit da ki trok kit umphniang bad ka jingkhleh ha ka umphniang ha ki jaka bapher-bapher ha shi lynter ka surokbah NH-6. Nalor kitei kiba la shah kem, ki don ruh sa kiwei pat kiba la phet krad mar sien wan poi ki pulit.
Ha ka jingleit khynra, ki pulit ki la kurup ruh bun tylli ki tiar kiba don bynta ha ka ban pynlang umphniang ba la sei na ki trok kit umphniang kiba ïaid lynti. Ha kajuh ka por, la lap bad kurup ruh ïa ki tiar ba la pyndonkam ha ka jingkhleh ïa ka umphniang ha kitei ki jaka.
Ki katto-katne ki tiar ba la ïoh kurup ki kynthup ïa 325 tylli ki top tylli, 24 tylli ki top ba suba don ‘Diesel’, 19 tylli ki top ba suba don ‘Petrol’, 12 tylli ki top ba suba don umphniang sharak, 7 tylli ki ‘Motor Pump’, 2 tylli ki ‘Generator’, 19 tylli ki ‘Mobile Phone’, 9 tylli ki trok kit umphiang, 6 tylli ki ‘Syntex’, 2 tylli ki ‘Calliber Hydrometer’, 23 tylli ki jyrkin bad 8 tylli ki kali.
Ki pulit ki la ong ba ki trok kit umphniang ki hap ban ïaid lyngba ka shi lynter ka NH-6 ha Ri-Bhoi hashwa ban leit sha kiwei pat ki bynta ka Jylla Meghalaya, Barrak Valley, Assam, Mizoram bad Tripura.
Ynda la poi ha kine ki jaka ha surokbah NH-6, ki sei kumba 100 litar ka umphniang na ka trok bad mih na kitei ki jaka sha ki jaka ba dei ban leit. Kane baroh ka shim por 10-15 minit. Kine ki jaka ha surokbah ki long kiba la pynïeng sh por kiba don ïa ki khyrdop ba-heh ba la ker da ki tin sop ïing ban pyntikna ba yn ym ïohi eiei na surokbah bad ki don ïa ka khyrdop mih bad rung na bynta ban pyntyllun sted ïa ka kam.
La lap ruh ba kawei ka jaka pdeng kaba pyntrei ïa kane ka kam ka biang lut nadong-shadong ïa ki tiat ki tar na bynta ban tuh bad pynsaphriang ïa ka umphniang da ki buit ban khleh eiei ha ka. Ban sngewthuh kham bniah ïa kane ka kam shukor, dei ban pynleit jingmut na ka jingpynïeng jong ki ha shi lynter ka surokbah ha kaba kumba 400 tylli ki trok kit umphniang ki ïaid ha ka shi sngi.
Ïa kane ka umphniang ba la tuh, hadien la die ha ka dor kaba duna sha ki jaka bapher-bapher bad pyndonkam ruh ha ka ban khleh, ha kawei ka liang kaba wanrah ka jingduhnong kaba jur ha ka ïoh ka kot bad ka jingduhnong ïa kito ki nongpyndonkam ki bym don jingtip eiei halor kane ka kam.
Kumba ka long, la ujor mukotduma ha thanat Crime Branch, Shillong bad ka jingtohkit ka dang ïaid naba la suba ba ka don da ka kynhun.
