Palestinian Territories, Naiwieng 26
Ka kynhun shipai jong ka Hamas ha ka Sngi U Blei ka la pyntip ba u ‘Commander’ ka Nor-thern Brigade, u Ahmed Al-Ghandour, lem bad lai ngut ki heh nongïalam ka kynhun ki la shah pynïap ha ka jingther jong ki shipai Israel.
Ha u kyrwoh, ka Ezzedine Al-Qassam Brigades ka la ong ba u Ghandour u la dei u dkhot ka Military Council bad lai ngut kiwei pat ba kynthup ïa u Ayman Siyyam. Ki lad pathai khubor na Israel ki la ong ba u Siyyam u dei u khlieh duh ka shnat jong ka Hamas kaba pynher ïa ki ‘namding sha Israel.
Haba bam smai ban bteng ban ïaid ha ka lynti jong u Ghandour bad kitei ki lai ngut, ka Hamas ka khlem ïathuh mynno kitei ki heh ka seng ki la shah pynïap.
Ha u snem 2017, u Ghandour u la long uwei na kiba ka sorkar America ka la kheiñ kum uta u ‘riew pyntriem ba shyrkhei ha ka pyrthei.
Ka State Department jong ka Sorkar America ka la ong ba u Ghandour u la donkti ha kiba bun tylli ki kam pyntriem kynthup ïa ka jingthombor ïa ka ktem ki shipai Israel ha u snem 2006 ha Kerem Shalom Border ha kaba arngut ki shipai Israel ki la ïap bad saw ngut ki la mynsaw.
Ka jingpynbna jong ka Hamas halor ka jingïap jong u Ghandour ka long ha ka sngi ba lai jong ka jingsangeh ïasiat hapdeng ka Israel bad Hamas ha Gaza.
Naduh ba sdang ka jingsangeh ïasiat bad haduh mynta, ka Hamas ka la pynphai noh ïa 26 ngut ki nong Israel kiba ka la rahbor ha ka 7 tarik Risaw katba ka Israel ka la pyllait noh ïa 78 ngut ki nong Palestine kiba ka la set patok baroh shi katta.
