Shillong, Naiwieng 26
Ka shlem treikam Indian Audit and Accounts Department (IAAD) ha Shillong ka la rakhe ïa ka Audit Diwas kaba lai da ki prokram naduh ka 16 haduh ka 24 tarik u Naiwieng 2023. Ka la don ka jingïatai halor ka phang “Strengthening the Functioning and Oversight of Local Governance Institutions in Meghalaya” ha ka 22 tarik u Naiwieng 2023 ha kaba ka Kong Patricia Mukhim, Editor “The Shillong Times” bad u Prof S. Umdor, Head, Economics Department, North Eastern Hill University Shillong ki la dei ki nongai jingkren ba kongsan, ka Inter College Quiz Competition bad ka Seminar halor ka phang “Enhancing Accountability through Geo-spatial Technology” ha ka 24 tarik u Naiwieng ba la pynlong ha ka jingïatreilang bad ka North Eastern Space Applications Centre (NESAC), Ka Tnat Kam Haw-Haw.
Lah ban shu kdew hangne ba ka President jong ka India ka la plie paidbah ïa ka jingrakhe ïa ka Audit Diwas kaba lai ha kylleng ka ri ha ka 16 tarik u Naiwieng 2023 ha ka shlem treikam CAG of India, New Delhi. La rakhe ïa ka Audit Diwas 2023 kum ka dak jong ka histori bad ka jinghiar pateng jong ka kynhun audit ba halor tam jong ka India.
Ka sngi ba khatduh jong kane ka jingrakhe kaba shi taïew ha Shillong ka la long ha shlem treikam jong u Pr Accountant General (A&E), Meghalaya Shillong ha ka 24 tarik u Naiwieng 2023 ha kaba u Bah C.H Kharshiing Pr Accountant General (A&E) bad ka Shefali S Andaleeb Pr Accountant General (Audit) & Director General, Regional Capacity Building and Knowledge Institute Shillong ki la ai jingkren shaphang ka jinglong kyrpang jong kane ka prokram bad ka bynta jong ki kynhun ka CAG ban wanrah jingbahkhlieh katkum ka kamram jong ka kumba la batai ha ka Riti Synshar jong ka ri.
Ha ka jingai jingkren shaphang ka bynta jong ka Teknoloji Haw-Haw na ka bynta ka roi ka par jong ka thaiñ Shatei Lam Mihngi, u Dr S.P. Agarwal, Director, NESAC u la kren shaphang ki jingjam shakhmat jong ka Indian Space Research Organisation ban pynkylla ïa ka India sha kawei na ki ri ba hakhmat tam ha kine ki kam. U la batai ruh shapahang ki lad ki lynti kiba don ha ka jingpyndonkam ïa ka spatial teknoloji ban pynkhlaiñ shuh shuh ïa ki kam audit.
U Dr Dibyajyoti Chutia, Head, GID, NESAC u la kren shaphang ka bynta jong ka Geospatial Teknoloji ba la pynkupbor da ka ICT ban pynkhlaiñ ïa ki kam jong ka Sorkar ha ka thaiñ Shatei Lam Mihngi katba u Nilay Nishant Scientist-SE, GID, NESAC u la pyni ïa ka North East Spatial Data Repository (NeSDR) bad ki atiar jong ka na ka bynta ki kam ka Sorkar bad ki kam peitngor.
Ha ka bynta kaba khatduh jong ka Inter-College Quiz Competition ba la pynïaid da u Bah Nicholas Jyrwa kum u nongpynïaid kyntip ba pawnam na ka nongbah, la don ka jingïashim bynta da hynriew tylli ki kynhun kiba la poi sha kane ka bynta kaba khatduh. Ha kaba kut, ka St Anthony’s College ba la mihkhmat da ka Christina Themsingphi A.S. bad u Debashish Kakati ki la long ki lahduh katba ka K.L Bajoria College ba la mihkhmat da u Dondor Nongrum bad Kenneth Lalringlien ki la wan ba ar bad u Marbiangdor Syiem bad Aiborlang Marbaniang na ka Shillong Law College ki la wan ba lai.
